سیالکوٹ: پی ٹی آئی کو اتوار سات مئی کو سیالکوٹ میں جلسہ کرنے کی اجازت مل گئی تاہم انتظامیہ نے جلسہ گاہ کے اطراف سڑکیں کھود دیں، مٹی کے ڈھیر لگادیے اور تعاون سے گریز کرنے لگی۔
تفصیلات کے مطابق شہری انتظامیہ کی جانب سے سیالکوٹ کے جناح اسٹیڈیم کے اطراف کی سڑکیں کھود دی گئیں، ہیوی مشنری نے سڑکیں کھود کر مٹی کے ڈھیر لگادیے۔
اے آر وائی نیوز کے نمائندہ سیالکوٹ عامر جاوید بٹ کے مطابق پی ٹی آئی کی جانب سے 34 کنٹینر اسٹیج بنانے کے لیے پرسوں سے یہاں موجود ہیں، اسٹیج کا سارا سامان یہاں پڑا ہے جس میں لائٹس اور دیگر اشیا شامل ہیں لیکن جگہ نہ ملنے کے سب اسٹیج نہیں بن پارہا اور انتظامیہ کسی بھی قسم کا کوئی تعاون نہیں کررہی۔
ان کا کہنا تھاکہ سامان جناح اسٹیڈیم کے باہر پڑا ہے اور دروازوں کو تالے لگے ہوئے ہیں۔
پی ٹی آئی کے ضلعی صدر عثمان ڈار نے کہا ہے کہ انتظامیہ کا یہ خیال ہے کہ ایسے اوچھے ہتھکنڈے کے ذریعے سونامی کی راہیں بند کرے گی تو یہ اس کی بھول ہے۔
