لاہور : تحریک انصاف کے رائے ونڈ مارچ کے دوران کارکنوں کی گرفتاریوں اور حکومتوں ارکان کے بیانات کے خلاف کاروائی کیلئے لاہور ہائیکورٹ نے دائر درخواست مزید سماعت کیلئے فل بنچ کو بجھوا دی۔
جسٹس یاور علی نے تحریک انصاف کے ولید اقبال کی درخواست پر سماعت کی، درخواست میں مؤقف اختیار کیا گیا ہے کہ تحریک انصاف ملک سے کرپشن کے خاتمے کیلئے مسلسل جدوجہد کررہی ہے۔
پانامہ لیکس میں وزیراعظم اور ان کے خاندان کے بیرون ملک اثاثوں کا انکشاف ہوا ہے، تحریک انصاف نے ہر فورم پر پانامہ لیکس کے حوالے سے تحقیقات کا مطالبہ کیا جس کے بعد اب احتجاجی تحریک چلائی جا رہی ہے۔
تحریک انصاف کے رائے ونڈ مارچ کے موقع پر حکومتی ارکان دھمکیاں دے رہے ہیں اور احتجاج کو ناکام بنانے کیلئے تحریک انصاف کے کارکنوں کو گرفتار کیا جارہا یے۔
درخواست گزار کی جانب سے اعتراض کیا گیا ہے کہ پرامن احتجاج، تحریک انصاف کا قانونی اور آئینی حق ہے، لہٰذا عدالت حکومت کو خلاف قانون ہتھکنڈے استعمال کرنے سے روکے اور گرفتار کارکنوں کو فوری رہا کرنے کا حکم دیا جائے، جبکہ دھمکی آمیز بیانات پر عابد شیر علی، زعیم قادری اور دیگر حکومتی ارکان کے خلاف کارروائی کا حکم دیا جائے۔
سرکاری وکیل کی جانب سے بتایا گیا کہ تحریک انصاف کے رائے ونڈ مارچ سے متعلق درخواستوں کی سماعت کیلئے جسٹس شاہد حمید ڈار کی سربراہی میں فل بنچ قائم کیا گیا ہے جس پر عدالت نے کیس مزید سماعت کیلئے فل بنچ کو بجھوا دیا۔
