کراچی: پی ٹی آئی کے رکن سندھ اسمبلی خرم شیر زمان نے کہا ہے کہ بلاول چاہتے ہیں کراچی کے اسپتال بھی اندرون سندھ جیسے ہوجائیں۔
تفصیلات کے مطابقق بلاول بھٹو زرداری کے بیان پر پی ٹی آئی کراچی کے صدر خرم شیر زمان نے ردعمل دیتے ہوئے کہا ہے کہ کراچی کے 3 بڑے اسپتال سپریم کورٹ کے حکم پر وفاق منتقل ہوئے ہیں، عدالتی حکم کی خلاف ورزی کرنے والا توہین عدالت کا مرتکب ہورہا ہے۔
خرم شیر زمان نے کہا کہ عوام کے حقوق کی بات کرنے والے بتائیں سندھ میں عوام کو کیا حقوق دئیے، روٹی، کپڑا اور مکان کے لالچ میں لوگوں کو ایڈز، بھوک، افلاس تحفے میں دیا، پیپلزپارٹی نے صحت کی ایمرجنسی لگا کر لاڑکانہ کو ایڈز کا گڑھ بنادیا۔
انہوں نے کہا کہ تین اسپتالوں کے علاوہ ضلعی اسپتالوں کی بات کیوں نہیں کی جاتی ہے،سول اسپتال، سندھ گورنمنٹ اسپتال میں بنیادی سہولتوں کا فقدان ہے، بلاول بھٹو احتجاج یا دھرنا دیں، وفاق اپنا نوٹیفکیشن واپس نہیں لے گا۔
پی ٹی آئی کراچی کے صدر نے کہا کہ نوٹیفکیشن کی واپسی کا مطالبہ دراصل عوام دشمن مطالبہ ہے، پیپلزپارٹی سیاسی مفاد میں عوامی مفاد بھول گئی ہے، بلاول اتحادی پی ٹی ایم کے افواج مخالف ایجنڈے کی حمایت کررہے ہیں۔
واضح رہے کہ اس سے قبل پیپلزپارٹی کے چیئرمین بلاول بھٹو زرداری کا کہنا تھا کہ کراچی کے تین بڑے اسپتالوں پر حکومت نے اپنا نوٹیفکیشن واپس نہ لیا تو سندھ کے عوام کے ساتھ اسلام آباد پہنچوں گا۔
ان کا کہنا تھا کہ ہم بھیک نہیں این ایف سی کے مطابق حق مانگ رہے ہیں، وفاقی حکومت ہمیں پانی کی کمی کا حساب نہیں دیتی، ون یونٹ لانے کی کوشش کی گئی تو پی پی دیوار بن کر کھڑی ہوگی۔
