اسلام آباد : گلگت بلتستان میں تاریخی کامیابی کے بعد تحریک انصاف نے آزاد کشمیر کے آئندہ انتخاب کے لئے منصوبہ بندی کا آغاز کردیا، چیف آرگنائزرسیف اللہ نیازی کا کہنا ہے کہ مؤثر انتخابی مہم سےآزاد کشمیر میں بھی دوتہائی اکثریت حاصل کریں گے۔
تفصلات کے مطابق تحریک انصاف نے آزاد کشمیر کے آئندہ انتخاب کےلئے منصوبہ بندی کا آغاز کردیا ، اس حوالے سے پی ٹی آئی آزاد کشمیر کے صدر سلطان چوہدری نے سیف اللہ نیازی سے ملاقات کی ، مرکزی سینئر نائب صدر ارشد داد بھی خصوصی ملاقات میں موجود تھے۔
ملاقات میں آزاد جموں و کشمیر کی سیاسی صورتحال اور تنظیمی امور پرتبادلہ خیال کیا گیا اور آزاد جموں وکشمیرمیں آئندہ انتخابات سےمتعلق اہم امور پر خصوصی بات چیت کی گئی۔
ملاقات میں انتخابی اتحادکےبغیرآزادجموں وکشمیرقانون سازاسمبلی انتخابات لڑنے پر اصولی اتفاق کیا گیا ، اس موقع پر چیف آرگنائزرسیف اللہ نیازی نے کہا کہ گلگت بلتستان میں تاریخی کامیابی پراللہ کےشکرگزار ہیں، تحریک انصاف آزاد جموں وکشمیر کی مضبوط اور توانا قوت بن چکی ہے۔
سیف اللہ نیازی کا کہنا تھا کہ بیرسٹر سلطان محمود کی قیادت میں اہم انتخابی معرکے کیلئے تیار ہیں، مؤثر انتخابی مہم سےآزاد کشمیر میں بھی دوتہائی اکثریت حاصل کریں گے۔
انھوں نے مزید کہا کہ موزوں امیدواروں کے تعین کیلئےجلدپارلیمانی بورڈ قائم کریں گے، کارکنان تیاری کریں،جلد آئندہ کے لائحہ عمل کااعلان کریں گے۔
