فیصل آباد میں ضلع کچہری کے باہر سے پی ٹی آئی کے سابق صوبائی وزیر خیال احمد کاسترو کو گرفتار کرلیا گیا۔
اے آر وائی نیوز کے مطابق پی ٹی آئی رہنما خیال کاسترو 9 مئی کیس میں مقامی عدالت سے ضمانت ملنے کے بعد واپس جارہے تھے جب پولیس نے انہیں گرفتار کیا۔
پی پی 118 سے پی ٹی آئی کے حمایت یافتہ امیدوار نو مئی کیس کی سماعت کے سلسلے میں مقامی عدالت میں پیش ہوئے تھے۔
خیال احمد کاسترو دوبارہ ضمانت ملنے کے بعد گھرجانے کیلئے ضلع کچہری سے باہر نکلے تو گیٹ پر ہی سادہ لباس پولیس اہلکاروں نے انہیں دبوچ لیا اور ڈنڈا ڈولی کرتے اورگھسیٹتے ہوئے گاڑی میں ڈال کر لےگئے۔
پی ٹی آئی رہنما کے اہل خانہ نے گرفتاری کی مذمت کرتے ہوئے کہا کہ ضمانت ملنے کے باوجود حراست میں لینے کا مقصد انہیں الیکشن میں حصہ لینے سے روکنا اور جمہوری حق سے محروم رکھنا ہے۔
