اسلام آباد : پی ٹی آئی کے جنرل سیکرٹری کے عہدے سے عمر ایوب کے استعفیٰ کے بعد پاکستان تحریک انصاف کے ایک اور رہنما جنید اکبر نے بھی پارٹی کی کور کمیٹی سے استعفیٰ دے دیا ہے۔
تفصیلات کے مطابق پی ٹی آئی ممبر اسمبلی جنید پارٹی قیادت سے متعلق کھل کر سامنے آگئے، ان کا کہنا ہے کہ پی ٹی آئی میرا گھر ہے، میں کسی گروپ کا حصہ ہوں نہ کبھی ہوں گا۔
انہوں نے کسی کا نام لیے بغیر بعض عہدیداران پر ذاتی مفادات رکھنے اور پارٹی کو اپنے مفاد کے لیے استعمال کرنے کا الزام عائد کیا۔
اپنے ایک بیان میں انہوں نے کہا کہ پارٹی کے چند مخصوص لوگ بانی پی ٹی آئی سے جیل میں ملنے جاتے ہیں لیکن ہمیں ملنے نہیں دیا جاتا۔
جنیداکبر کا کہنا ہے کہ ان لوگوں کے ایک دوسرے کے ساتھ مفادات ہیں، ہمیں صرف یہی بتایا جاتا ہے موجودہ پارٹی پالیسی بانی پی ٹی آئی کی ہے۔
رہنما تحریک انصاف نے کہا کہ بدقسمتی ہے کہ سارے فیصلوں کے بینفشری یہی لوگ اور خاندان ہیں، میں کارکنان کی تنقید کا حصہ نہیں بننا چاہتا۔
رکن قومی اسمبلی نے مزید کہا کہ پارٹی فیصلوں میں میرا کوئی اختیار نہیں اور نہ ہی بانی پی ٹی آئی تک میری رسائی ہے، کارکنان کے ساتھ مل کر احتساب کیلئے تحریک شروع کریں گے۔
یاد رہے کہ تحریک انصاف رہنما کا یہ استعفیٰ پی ٹی آئی کے سیکرٹری جنرل عمر ایوب خان کے پارٹی عہدوں سے مستعفی ہونے کے ایک روز بعد سامنے آیا ہے۔
عمر ایوب جو کہ قومی اسمبلی میں قائد حزب اختلاف بھی ہیں نے 22 جون کو اپنا استعفیٰ پیش کیا تھا جسے بانی چیئرمین عمران خان نے قبول کرلیا۔
اپنے استعفے میں عمر ایوب نے لکھا کہ ان کے لیے پارٹی کے سیکریٹری جنرل کے طور پر کام جاری رکھنا ممکن نہیں، میں بطور اپوزیشن لیڈر پارٹی کے سیکریٹری جنرل کے عہدے سے انصاف نہیں کر پا رہا تھا۔
انہوں نے یہ بھی عندیہ دیا کہ وہ پی ٹی آئی کے مرکزی مالیاتی بورڈ کے چیئرمین کے عہدے سے بھی سبکدوش ہو جائیں گے تاہم انہوں نے کہا کہ وہ پارٹی ورکر کے طور پر کام جاری رکھیں گے۔
بعد ازاں پی ٹی آئی پارلیمانی پارٹی نے عمر ایوب کا بطور سیکریٹری جنرل استعفیٰ مسترد کرتے ہوئے ان کا استعفی منظور نہ کرنے کی قرار داد پیش کر دی قرارداد میں کہا گیا کہ انہوں نے مشکل ترین حالات میں پارٹی معاملات کو چلایا۔
