پشاور : پی ٹی آئی خیبر پختونخوا کے رہنما کو نامعلوم افراد نے تشدد کا نشانہ بنا کر شدید زخمی کردیا، علی زمان ایڈووکیٹ کو طبی امداد کیلیے مقامی اسپتال میں داخل کرادیا گیا۔
تفصیلات کے مطابق پاکستان تحریک انصاف (پی ٹی آئی کے پی) کے رہنما اور پی کے 73 سے سابق امیدوار علی زمان ایڈووکیٹ کو عیدگاہ روڈ پر نامعلوم ملزمان نے زدوکوب کیا۔
نامعلوم افراد کے بہیمانہ تشدد سے پی ٹی آئی رہنما علی زمان ایڈووکیٹ شدید زخمی ہوگئے جنہیں طبی امداد کی فراہمی کیلئے فوری طور پر ایل آرایچ اسپتال منتقل کیا گیا۔
واقعے کی اطلاع ملتے ہی وزیراعلیٰ کے پی علی امین گنڈاپور ان کی عیادت کیلئےایل آرایچ اسپتال پہنچ گئے۔
اس کے علاوہ سابق گورنرشاہ فرمان، اسپیکر بابر سلیم سواتی، وزرا مینا خان، ظاہر شاہ اور پختون یار نے بھی علی زمان ایڈووکیٹ کی عیادت کی۔
یاد رہے کہ گزشتہ ماہ تحریک انصاف کے مرکزی سیکریٹری اطلاعات رؤف حسن پر بھی اسلام آباد کے علاقے جی سیون میں خواجہ سراؤں نے بلیڈ سے حملہ کرکے ان کو شدید زخمی کردیا تھا۔
