اسلام آباد: انسداد دہشتگردی عدالت نے پاکستان تحریک انصاف (پی ٹی آئی) کے رہنماؤں کی 26 نومبر احتجاج پر درج مقدمات میں عبوری ضمانتوں میں توسیع کر دی گئی۔
پی ٹی آئی رہنماؤں کی مجموعی طور پر 229 ضمانت قبل از گرفتاری کی درخواستوں پر سماعت ڈیوٹی جج طاہر عباس سپرا نے کی، عدالت نے پی ٹی آئی رہنماؤں کی عبوری ضمانتوں میں 22 جولائی تک توسیع کی اور پولیس کو رہنماؤں کو متعلقہ مقدمات میں گرفتاری سے روک دیا۔
یہ بھی پڑھیں: 26 نومبر کے مقدمات میں بشریٰ بی بی کی عبوری ضمانت میں توسیع
انسداد دہشتگردی عدالت نے پی ٹی آئی کے رکن قومی اسمبلی عبدالطیف چترالی کی ضمانت قبل ازگرفتاری کی درخواست خارج کرتے ہوئے کہا کہ وہ 9 مئی کے مقدمے میں سزا یافتہ ہیں، انہوں نے ابھی تک سرینڈر نہیں کیا۔
عدالت نے کہا کہ ایسے شخص کو فیور نہیں دی جا سکتی جو قانون سے بھاگا ہو۔ وکیل صفائی نے کہا کہ ہم اپنی درخواست واپس لے لیتے ہیں۔ اس پر عدالت نے کہا کہ درخواست ضمانت واپس نہیں ہو سکتی۔
جج ابوالحسنات محمد ذوالقرنین کی عدم دستیابی کے باعث فریقین کے وکلا نے دلائل نہ دیے، عدالت نے تمام درخواستوں پر سماعت 22 جولائی تک ملتوی کر دی۔
عدالت میں بشریٰ بی بی، عمر ایوب، شہریار آفریدی اور ایمان وسیم کی حاضری سے استثنیٰ کی درخواستیں دائر کی گئی۔ سیمابیہ طاہر، زرتاج گل، مشعال یوسفزئی، سلمان اکرم راجہ، راجہ بشارت، عمیر نیازی، شیر علی ارباب، شہرام ترکئی، علی بخاری، رؤف حسن اور دیگر اے ٹی سی میں پیش ہوئے۔
ملزمان کے خلاف تھانہ کراچی کمپنی، رمنا، سیکرٹریٹ، ترنول و دیگر میں مقدمات درج ہیں۔
