The news is by your side.

‘عمران خان ہماری ریڈ لائن ہے’ تحریک انصاف کے رہنماؤں کی عوام سے بنی گالہ پہنچنے کی گزارش

اسلام آباد : تحریک انصاف کے رہنماؤں نے عوام سے بنی گالہ پہنچنے کی گزارش کرتے ہوئے کہا کہ عمران خان ریڈ لائن ہے۔

تفصیلات کے مطابق تحریک انصاف کے رہنما فواد چوہدری نے سماجی رابطے کی ویب سائٹ ٹوئٹر پر اپنے بیان میں کہا کہ فیصل آباد سے بسوں میں قافلے بنی گالہ کیلئے رواں دواں ہیں، آپ جہاں بھی ہیں آج بنی گالہ پہنچیں اور عمران خان کے ساتھ یکجہتی کااظہارکریں، عمران خان ہماری ریڈ لائن ہے۔

دوسری جانب پی ٹی آئی رہنما فیصل جاوید نے بنی گالہ کے باہر میڈیا سے گفتگو کرتے ہوئے کہا کہ حقیقی آزادی کا سفر فیصلہ کن مرحلے میں داخل ہوگیا ہے، سب سے گزارش ہے بنی گالہ پہنچیں۔

فیصل جاوید کا کہنا تھا کہ امپورٹڈ حکومت کی حرکتوں سے یہ آشکار ہوچکا کہ وہ گھبرا چکی ہے، سوات کے ضمنی الیکشن میں 12 جماعتوں کوعمران خان نے شکست دی۔

انھوں نے کہا کہ پنجاب اور کراچی کے ضمنی الیکشن میں عمران خان کامیاب ہوئے، ثابت ہوگیا کہ قوم کے سب مقبول لیڈر عمران خان ہیں۔

خیال رہے سوشل میڈیا پر عمران خان کی گرفتاری کی خبروں پر رات گئے پی ٹی آئی کے کارکنوں کی بڑی تعداد بنی گالہ کے باہر جمع ہوگئی تھی، اس کے علاوہ اسد عمر، مراد سعید سمیت تحریک انصاف کی قیادت بھی بنی گالہ پہنچ گئی۔

پی ٹی آئی رہنما حماد اظہر نے اپنے ٹوئٹ میں لکھا انٹرنیٹ کی بندش ہوئی تو سمجھ لیں امپورٹڈ سرکار کے عوامی احتساب کا وقت آگیا ، سب لوگ اسلام آباد پہنچیں۔

Comments

یہ بھی پڑھیں