اسلام آباد: ملک کے معاشی، دفاعی اور خارجہ چیلنجز پر تین وفاقی وزرا نے اہم ملاقات کی ہے، اس ملاقات میں وزیرِ خزانہ، وزیرِ دفاع اور وزیرِ خارجہ شامل تھے۔
تفصیلات کے مطابق ملک کو درپیش معاشی، دفاعی اور بیرونی سطح پر درپیش چیلنجز کے حوالے سے وفاقی وزرا اسد عمر، پرویز خٹک اور شاہ محمود قریشی کے درمیان اہم ملاقات ہوئی۔
ملاقات میں ملکی معیشت، دفاع سمیت دیگر اہم موضوعات پر تبادلۂ خیال کیا گیا۔
ملاقات میں وزیر خزانہ اسد عمر نے کہا کہ پاکستان کے اقتصادی اور معاشی استحکام کے لیے سفارت کاری کا اقدام سود مند ثابت ہوگا۔
وزیر خارجہ شاہ محمود قریشی کا کہنا تھا کہ ملک کے معاشی استحکام میں ای ویزا، سیاحت، تجارت اور بیرونی سرمایہ کاری کا فروغ سنگِ میل ثابت ہوگی۔
وزیرِ دفاع پرویز خٹک کا کہنا تھا کہ وزارتِ خارجہ نے بہترین سفارت کاری کے ذریعے دنیا کی توجہ پاکستان کی طرف مبذول کرائی ہے۔
یہ بھی پڑھیں: وزیراعظم نے آن لائن ویزا سروس کا افتتاح کر دیا
دریں اثنا، وفاقی وزرا نے دنیا میں پاکستان کا تشخص مؤثر انداز میں اجاگر کرنے پر وزیرِ خارجہ شاہ محمود قریشی کو مبارک باد پیش کی۔
خیال رہے کہ ملک میں سیاحت کے شعبے کو فروغ دینے کے لیے آج وزیرِ اعظم عمران خان نے نئی ویزا پالیسی کا افتتاح بٹن دبا کر کیا، جس کے تحت 175 ملکوں کے لیے آن لائن ویزا جب کہ 50 ممالک کے شہریوں کو آن ارائیول ویزا جاری ہوگا۔
