اسلام آباد : پاکستان تحریک انصاف (پی ٹی آئی) کی مذاکراتی کمیٹی کو بانی پی ٹی آئی سے ملاقات کی اجازت مل گئی، کمیٹی ملاقات میں مطالبات سے متعلق مشاورت کرے گی۔
تفصیلات کے مطابق پاکستان تحریک انصاف (پی ٹی آئی) کی مذاکراتی کمیٹی کو بانی پی ٹی آئی سے ملاقات کی اجازت دیدی گئی۔
ذرائع نے بتایا کہ مذاکراتی کمیٹی آج اڈیالہ جیل نہ پہنچی تو پھر پیر یا منگل کو ملاقات کاامکان ہے، مذاکراتی کمیٹی مطالبات سے متعلق عمران خان سے مشاورت کرے گی۔
ذرائع کا کہنا ہے کہ کہ اس دوران وزیراعلیٰ خیبرپختونخوا علی امین گنڈاپورکی بھی ملاقات کا امکان ہے۔
گذشتہ روز وزیراعظم کے مشیر برائے سیاسی امور راناثنااللہ نے اے آر وائی نیوز کے پروگرام ‘اعتراض ہے’ میں گفتگو میں کہا تھا کہ پی ٹی آئی مذاکراتی کمیٹی کی بانی پی ٹی آئی سے ملاقات ہونی چاہیے، ہفتے یا پیر کو کمیٹی کی عمران خان سے ملاقات ہو جائے گی۔
ان کا کہنا تھا کہ مذاکرات جاری ہیں ایسی بات نہیں کرنی چاہیے جس سےمنفی تاثرجائے، پی ٹی آئی کل مذاکرات میں تحریری مطالبات پیش کرتے تو اچھا ہوتا۔
