پی ٹی آئی رہنما اور قومی اسمبلی میں اپوزیشن لیڈر عمر ایوب نے کہا ہے ک موجودہ وزیراعظم شہباز شریف بے اختیار ہیں۔
اے آر وائی نیوز کے مطابق پاکستان تحریک انصاف کے رہنما اور قومی اسمبلی میں اپوزیشن لیڈر عمر ایوب نے سرگودھا میں انسداد دہشتگردی کی عدالت کے باہر میڈیا سے گفتگو کرتے ہوئے کہا ہے کہ شہباز شریف بے اختیار وزیراعظم ہیں اور ان کے اختیار میں کچھ بھی نہیں ہے۔
اپوزیشن لیڈر نے کہا کہ پارلیمانی کمیٹی کیلیے میرے لکھے خط کا وزیراعظم نے ابھی تک جواب نہیں دیا۔ یہ معاملہ کو لٹکانا چاہتے ہیں لیکن ہم ایسا نہیں ہونے دیں گے۔
عمر ایوب نے مزید کہا کہ موجودہ حکومت کی پالیسیوں کے باعث مہنگائی میں اضافہ ہوا۔ اب حکومت پیکا ایکٹ کے تحت آزادی رائے پر قدغن لگا رہی ہے۔ پاکستان میں آزادی صحافت یا آزادی کی بات کرنے کا معاملہ ختم ہو چکا ہے۔ میڈیا نمائندگان اب نہ کھل کا لکھ سکتے ہیں اور نہ ہی کھل کر بات کر سکتے ہیں لیکن ہم اس ایکٹ کو مسترد کرتے ہیں۔
ان کا کہنا تھا کہ جس طرح پیپلز پارٹی والے پیکا قانون کے خلاف باتیں کرتے تھے اور اب خاموش ہیں۔ اسی طرح وہ سندھ کے لوگوں کا سودا کر کے پانی تقسیم کرنے پر راضی ہوجائیں گے۔
اپوزیشن لیڈر نے کہا کہ موجودہ سیاسی بحران کے ذمہ دار سکندر سلطان راجہ ہیں۔ چیف الیکشن کمشنر نے الیکشن چوری کرانے میں موجودہ حکمرانوں کا ساتھ دیا۔ ان پر آرٹیکل 6 لگنا چاہیے۔
عمر ایوب نے مزید کہا کہ ہم عدالتوں میں پیش ہو رہے ہیں لیکن ہمارا قصور کیا ہے معلوم نہیں۔ 8 فروری کو پی ٹی آئی کا صوابی میں بھرپور جلسہ ہوگا۔ تحریک انصاف کا امریکا میں اقتدار کی تبدیلی سے کوئی تعلق ہے اور نہ ہی کوئی امید۔
