اسلام آباد:حکومت کی مذاکرات کی پیشکش پر پاکستان تحریک انصاف کے چیئرمین بیرسٹر گوہر نے ردعمل دیا ہے۔
تفصیلات کے مطابق چیئرمین پی ٹی آئی بیرسٹر گوہر حکومت کی مذاکرات کی پیشکش پر کہا کہ حکومتی جماعت کا طرز عمل غیر سیاسی ہے، یہ کیا ہوا آؤ بیٹھیں، مذاکرات کریں؟ کیا دعوت اس طرح دیتے ہیں؟۔
بیرسٹر گوہر نے کہا کہ کیا سیاسی جماعتیں مذاکرات کی دعوت اس انداز میں دیتی ہیں؟ ہم تو پُرامن احتجاج تک نہیں کر سکتے، اسطرح مذاکرات کی پیشکش کیسے تسلیم کر لیں؟۔
حکومت کی تحریک انصاف کو پھر مذاکرات کی پیشکش
پاکستان تحریک انصاف کے چیئرمین بیرسٹر گوہر نے مزید کہا کہ ہمارے لوگوں کو گرفتار کیا جارہاہے، چادر اور چار دیواری کو پامال کیا جارہاہے۔
واضح رہے کہ وفاقی وزیر پٹرولیم مصدق ملک نے اسلام آباد میں پریس کانفرنس میں پی ٹی آئی کو مذاکرات کی پیشکش کرتے ہوئے کہا تھا کہ ہم کہتے ہیں آئیں مل کر بیٹھیں، بات کرتے ہیں، معاملات کو سلجھاتے ہیں۔
مصدق ملک نے کہا تھا کہ بات کرو لیکن برباد مت کرو، ملک کو الجھاؤ نہیں بلکہ سلجھاؤ، ہم نے کہا آؤ حکومت بنائیں آپ کہتے ہیں ہم نہیں بنائیں گے، آج آپ اُدھم مچارہے، آپ اپنے بچوں کے مستقبل کے ساتھ ظلم کررہے ہیں، ہمیں ہٹانا ہے ہٹادیں، مگر ملک ایسے ہی چلتا رہا تو برباد ہوجائے گا۔
