ڈیرہ اسماعیل خان: جمعیت علمائے اسلام (ف) کے سربراہ مولانا فضل الرحمان نے تحریک انصاف کو تنقید کا نشانہ بناتے ہوئے کہا ہے کہ پی ٹی آئی کو آج یومِ تشکر کے بجائے یومِ ندامت یا یومِ سیاہ منانا چاہیے۔
جمعیت علمائے اسلام کے سربراہ مولانا فضل الرحمان اپنی رہائش گاہ پر میڈیا سےگفتگوکر رہے تھے۔
انہوں نے پاناما کیس پرعدالتی کمیشن کے اچانک قیام پر تشویش کا اظہار کرتے ہوئے کہا کہ حیران کن طور پر ناقابل سماعت پٹیشن اچانک کیوں راتوں رات قابل سماعت ہوگئی۔انہوں نے تحریک انصاف کا نام لیے بغیر کہا کہ مقدمے کا ایک فریق کھلےعا م کمیشن کے قیام کو اپنےدباؤ کانتیجہ قرار دے رہا ہے اس طرح پٹیشن پر سوالات اٹھیں گے۔
مولانا فضل الرحمان نے خیبر پختونخوا کے وزیر اعلیٰ پرویز خٹک کی جانب سے کی گئی متنازع تقریر کو تنقید کا نشانہ بناتے ہوئے کہا کہ وزیر اعلیٰ کے پی کے نے اپنی تقریر سے قوم کو تقسیم کرنے کا باعث بن رہے ہیں اور ملکی وحدت کو نقصان پہنچارہے ہیں۔
انہوں نے حکومت پاکستان سے مطالبہ کیا کہ وزیر اعلیٰ خیبر پختونخوا پر نہ صرف یہ کہ غداری کا مقدمہ درج کیا جائے بلکہ قرار واقعی سزا بھی دی جائے تاکہ آئندہ کوئی بھی اپنے مذموم مقاصد کے حصول کے لیے صوبائی منافرت پھیلا کر ملک کے اتحاد و اتفاق کو پارہ پارہ کرنے کی جرات نہ کر سکے۔
