شیرافضل مروت نے کہا ہے کہ پی ٹی آئی سوشل میڈیا کے کچھ لوگ ڈالروں کیلئے ریاست پر حملہ آور ہیں، کچھ لوگ لالچ اور ڈالروں کے چکر میں ہیں۔
تفصیلات کے مطابق پی ٹی آئی سے نکالے جانے والے رہنما شیرافضل مروت کا کہنا تھا کہ پی ٹی آئی سوشل میڈیا کے کچھ لوگ ڈالر کےلیے ریاست کو گالیاں دیتےہیں، عمران ریاض، شہباز گل، حیدر مہدی اور عادل راجہ جیسے لوگوں نے پارٹی کی ڈائریکشن خراب کی۔
انھوں نے کہا کہ باہر بیٹھ کر یہ لوگ اپنے آپ کو شہ زور کہتے ہیں اور ڈالر بھی کما رہے ہیں، یہ پروپیگنڈا کرتے ہیں، خبریں کوئی نہیں ہوتی یہ بات کا بتنگڑ بناتے ہیں۔
شیرافضل مروت نے کہا کہ کبھی کہتےہیں بانی پی ٹی آئی کی طبیعت خراب ہے، کان میں انفیکشن ہوگیا، کبھی پروپیگنڈا کیا جاتا ہے کہ بانی پی ٹی آئی کا کھانا بند کردیا گیا ہے۔
انھوں نے کہا کہ عید بعد پی ٹی آئی کے کسی احتجاج میں شریک نہیں ہوں گا، میں نے پی ٹی آئی کو 3 ماہ کےلیے خیرباد کہہ رکھا ہے، 3 ماہ تک پی ٹی آئی کی کسی بھی ایکٹویٹی میں شرکت نہیں کروں گا، پارٹی انتشار کا شکار ہے، فارورڈ بلاک کی باتیں ہورہی ہیں۔
شیر افضل نے کہا کہ کچھ لوگ ایسے ہیں جنھیں پی ٹی آئی نے مفت میں بدنام کیا، ایسے لوگوں کو بدنام کیا گیا جن کے نہ ضمیر بکے اور نہ پیسے لیے، پی ٹی آئی ارکان کے خلاف ایکشن لےکر ان کےلیے کیا راستہ چھوڑا گیا۔
انھوں نے کہا کہ اس وقت صرف خیبر پختونخوا میں پی ٹی آئی کی تنظیم ہے، پی ٹی آئی کی تنظیم دیگر صوبوں میں اب برائے نام ہے، پی ٹی آئی کی پنجاب میں85 فیصد تنظیم نہیں ہے، علی امین کو لپیٹا گیا تو ان کا بھی پارٹی میں مستقبل نہیں ہوگا۔
نظر آرہا ہے کہ علی امین کےخلاف سازشیں ہورہی ہیں، علی امین پر ہاتھ ڈالا گیا تو پی ٹی آئی کےپی میں بکھر جائےگی۔
