اسلام آباد : پاکستان تحریک انصاف نے منحرف ارکان کوشوکاز نوٹس جاری کرنے کا فیصلہ کرلیا، نوٹس میں ارکان کو 7 دن میں معافی مانگ کر غیر مشروط پارٹی میں واپس آنے کی مہلت دی گئی ہے۔
تفصیلات کے مطابق پاکستان تحریک انصاف نے منحرف ارکان کوشوکاز نوٹس جاری کرنے کا فیصلہ کرلیا ، ، ذرائع کا کہنا ہے کہ منحرف ارکان کے شو کاز نوٹسز تیار ہے اور دستخط کر دیے گئے ہیں۔
وزیراعظم کی زیر صدارت سیاسی کمیٹی اجلاس میں شوکازجاری کرنے کافیصلہ کیا گیا ، شوکاز نوٹس میں منحرف ارکان سے وضاحت طلب کی گئی ہے۔
ذرائع کے مطابق ارکان کو 7 دن میں معافی مانگ کر غیر مشروط پارٹی میں واپس آنے کی مہلت دی گئی ہے جبکہ 7 دن تک جواب نہ دینے اور واپس نہ آنے والوں کے خلاف قانونی کارروائی کی جائے گی۔
پارٹی ذرائع نے بتایا کہ گرین سگنل ملتے ہی شو کاز نوٹس جاری کر دئیے جائیں گے۔
یاد رہے گذشتہ روز وزیراعظم عمران خان نے منحرف اراکین کے خلاف قانونی کارروائی کا فیصلہ کرتے ہوئے عامر کیانی ،بابر اعوان کو قانونی کارروائی کی ہدایت کی تھی۔
عمران خان نے کہا تھا کہ ایسے اقدامات کریں گے کہ مستقبل میں کسی کوہارس ٹریڈنگ کی جرات نہ ہو۔
