سوات : پاکستان تحریک انصاف آج سوات میں پاور شو کرے گی ، جلسے سے وزیراعلیٰ کے پی علی امین گنڈا پور، بیرسٹرگوہر، عمر ایوب خطاب کریں گے۔
تفصیلات کے مطابق پاکستان تحریک انصاف (پی ٹی آئی) کا آج سوات میں جلسہ ہورہا ہے ، جلسے کے انتظامات مکمل کرلئے گئے ہیں۔
جلسہ گاہ میں 15 ہزارکرسیاں لگادی گئیں ہیں اور سیکیورٹی کے بھی فل پروف انتظامات کئے گئے ہیں۔
جلسے سے وزیراعلیٰ کے پی علی امین گنڈا پور، بیرسٹرگوہر، عمر ایوب خطاب ، پشتونخوامیپ کے محمود خان اچکزئی اورسنی اتحاد کے حامد رضا خطاب کریں گے۔
ڈی پی او کا کہنا ہے کہ جلسے کی سیکیورٹی پر ایک ہزارپولیس اہلکار تعینات ہوں گے۔
گذشتہ روز رہنما پی ٹی آئی اسد قیصر کا کہنا تھا کہ تحریک تحفظ آئین پاکستان کا سوات میں تاریخی جلسہ ہو گا، جلسہ کا مقصد ہے کہ پاکستان میں آئین اور قانون کی بالادستی ہو۔
اسد قیصر کا کہنا تھا کہ بانی تحریک انصاف کو جیل سے نکالنے کیلئےجلسہ کیا جا رہا ہے، ان کیساتھ جیل میں جو ظلم ہورہاہے اس کیلئے آواز بلند کرنا ہے۔
یاد رہے اسلام آباد انتظامیہ کی جانب سے 8 جون کو روات کے مقام پر جلسے کی اجازت سے انکار پر پی ٹی آئی نے سوات میں جلسہ کرنے کا فیصلہ کیا تھا۔
تحریک انصاف نے روات میں جلسے کی اجازت نہ دینے کوبد نیتی قراردیتے ہوئے کہا پرامن جلسہ کرنا ہماراجمہوری اور آئینی حق ہے۔
پاکستان تحریک انصاف کا کہنا تھا کہ انتظامیہ نے جلسے کو سبوتاز کرنے اور خلل ڈالنے کیلئے دوردرازمقام طے کیا، انتظامیہ ایف 9 پارک، پریڈ گراؤنڈ یا ترنول کےمقام پرجلسےکی اجازت دے۔
