پاکستان تحریک انصاف نے سندھ میں بلدیاتی انتخابات کو کالعدم قرار دے کر کراچی میں بلدیاتی الیکشن دوبارہ کرانے کامطالبہ کیا ہے۔
اسلام آباد میں تحریک انصاف کے رہنما اسد عمر نے پریس کانفرنس میں کہا کہ الیکشن کمیشن کراچی اور حیدرآباد میں صاف شفاف الیکشن کرانے میں ناکام رہا، الیکشن کمیشن کو مستعفی ہونا چاہیے اور الیکشن کالعدم قرار دیاجائے۔
پی ٹی آئی رہنما نے کہا کہ کسی بھی صورت ہم یہ الیکشن قبول نہیں کرینگے، الیکشن کمیشن مستعفیٰ ہو اور کراچی میں ایک نیا الیکشن ہونا چاہئے ہم اس الیکشن کو مکمل طور پر مسترد کرتے ہیں اس کے خلاف ہمارا احتجاج ہوتا رہے گا۔
اسدعمر نے کہا کہ یہ جتنابھی کوشش کرلیں کراچی کی آوازاب دبائی نہیں جاسکتی، اسی الیکشن کمیشن نے میری گرفتاری کے وارنٹ جاری کیے ہوئے ہیں، عدلیہ سے گزارش ہے ریفرنسز پر فیصلہ کریں کیوں کہ 2023 الیکشن کاسال ہے اسی سال صوبائی اورقومی الیکشن ہونے ہیں، الیکشن کیلئے ضروری ہے غیر جانبدار الیکشن کمیشن ہو۔
پی ٹی آئی کے رہنما نے کہا کہ بلدیاتی انتخابات ملتوی کرنےکی بڑی وجہ امپورٹڈ حکومت کا مینڈیٹ چوری کرنا تھا، کراچی والوں کو دیوار سے لگانے میں جو بھی ملوث ہے وہ پاکستان کیخلاف سازش ہے۔
انہوں نے کہا کہ کراچی نےہمیشہ کی طرح پیپلزپارٹی کو مسترد کیا ہے جماعت اسلامی کی بھی سیٹیں چھینی گئی ہیں کراچی میں ووٹ ڈالنے والوں کا حق چھینا جارہا ہے۔
اسد عمر کا کہنا تھا کہ سب سے زیادہ ٹیکس دینے والے شہر کی آبادی کا شمار نہیں کرنے دیا جارہا، عمران خان نے جو مردم شماری کا اعلان کیا وہ تمام تاریخیں گزرگئی ہیں، ہر طریقے سے کراچی کو دیوار سے لگایا جارہا ہے کراچی کو بتایا جارہا ہے مردم شماری کرکے آپ کی صحیح گنتی نہیں کرنے دینگے یہ لوگ کراچی کو حق کے مطابق ریونیو نہیں دینا چاہتے ہیں۔
