اسلام آباد : انسداد دہشتگردی کی عدالت میں پی ٹی وی اورپارلیمنٹ حملہ کیس میں پاکستان تحریک انصاف کے سربراہ عمران خان کو آج کی حاضری سےاستثناء مل گیا۔
تفصیلات کے مطابق اسلام آباد میں پی ٹی وی اور پارلیمنٹ حملہ کیس کی سماعت انسداددہشت گردی عدالت کے جج کوثرعباس زیدی نےکی ، عمران خان کی جانب سے شاہد نسیم گوندل ایڈووکیٹ پیش ہوئے جبکہ فیصل چوہدری اورعلی بخاری ایڈووکیٹ بھی عدالت میں پیش ہوئے۔
سماعت کے دوران پی ٹی آئی کے وکلاء نے عمران خان اور دیگر ملزمان کی حاضری سے استثناء کی درخواست دائر کی، عدالت نے حاضری سے استثنی کی درخواست منظور کرتے ہوئے کیس کی سماعت غیرمعینہ ملتوی کر دی۔
عدالت کا کہنا ہے کہ نئی تاریخ بعد میں دی جائے گی۔
یاد رہے عمران خان کو پی ٹی وی اورپارلیمنٹ پرحملےکےکیس کے ساتھ سابق ایس ایس پی عصمت اللہ جونیجو تشدد کیس میں بھی اشتہاری قرار دیا گیا تھا۔
واضح رہے کہ عمران خان سمیت پارٹی کے دیگر رہنماؤں پر 2014 کے دھرنے کے دوران 4 مقدمات درج کیے گئے تھے، جن میں پی ٹی وی کے دفتر، پارلیمنٹ اور ایس ایس پی تشدد سمیت لاؤڈ اسپیکر ایکٹ کی خلاف ورزی کا مقدمہ شامل ہے۔
سنہ 2014 میں تحریک انصاف کے دھرنے کے دوران عمران خان اور تحریکِ انصاف کے رہنماء عارف علوی کی مبینہ ٹیلیفونک گفتگو منظرِ عام پر آ ئی تھی ‘ جس میں عمران خان مبینہ طور پر حملہ کرنے کا کہہ رہے تھے۔
