کراچی: کراچی سے لاہور جانے والی عوام ایکسپریس روہڑی کےقریب ٹرین ڈرائیور کی حاضر دماغی کے باعث بڑے حادثے سے بال بال بچ گئی۔
تفصیلات کے مطابق عوام ایکسپریس اپنی منزل کی جانب رواں دواں تھی کہ ٹرین نے جیسے ہی مرادشاہ پھاٹک کراس کیا تو ٹریک کی فش پلیٹیں کھل گئیں جس سے ریلوے لائن دو حصوں میں تقسیم ہوگئی۔
یہ بھی پڑھیں: سانحہ تیزگام : 62جاں بحق افراد میں سے اب تک صرف5 لاشوں کی شناخت ہوسکی
ذرائع کا کہنا ہے کہ اچانک پیدا ہونے والی اس غیر معمولی صورتحال میں ٹرین ڈرائیور نے حاضر دماغی کا مظاہرہ کرتے ہوئے ہنگامی بریک لگا کر ٹرین کو روک لیا جس کے باعث ٹرین بڑے حادثے سے بال بال بچ گئی۔
ذرائع نے بتایا کہ حادثےکے باعث اپ لائن پر ریلوے ٹریفک معطل ہو گئی اور کراچی سے آنے والی سندھ ایکسپریس اور رحمان بابا ایکسپریس کو روہڑی میں روک لیا گیا۔
