لاہور : پبلک سروس کمیشن کے امتحان کے موقع پر 28 اور 29 ستمبر کو دفعہ 144نافذ کردی گئی، پابندی کا اطلاق صبح ساڑھے 8 سے شام ساڑھے 4 بجے تک ہوگا۔
تفصیلات کے مطابق پبلک سروس کمیشن کے امتحان کے موقع پر پنجاب کے 7 شہروں کے امتحانی مراکز میں دفعہ 144 نافذ کردی گئی۔
محکمہ داخلہ پنجاب نے 28 اور 29 ستمبر کو دفعہ 144 کے نفاذ کا نوٹیفکیشن جاری کردیا ہے، جس میں کہا ہے کہ لاہور، راولپنڈی ، سرگودھا، فیصل آباد، ملتان ، بہاولپور اور ڈی جی خان کے امتحانی مراکزپر دفعہ 144 نافذ ہوگی۔
نوٹیفکیشن میں کہنا ہے کہ امتحانی مراکز کے اطراف پابندی کا اطلاق صبح ساڑھے 8 سے شام ساڑھے 4 بجے تک ہوگا اور امتحانی مراکز سے 100گز فاصلے تک غیر متعلقہ افراد کی نقل و حرکت پر پابندی ہوگی۔
پنجاب کے7 شہروں میں 25 امتحانی مراکز میں پبلک سروس کمیشن کے امتحان ہوں گے۔
خیال رہے پنجاب کے 12 شہروں میں 22 ستمبر کو ایم ڈی کیٹ داخلہ ٹیسٹ کا انعقاد ہوا تھا ، اس موقع پر نقل کی روک تھام کیلئے اقدام کرتے ہوئے ٹیسٹ کےدوران موبائل،انٹرنیٹ سروسز معطل کردی تھی۔
ٹیسٹ کیلئےپنجاب کے12 اضلاع میں 26امتحانی مراکزبنائے گئے تھے، تمام امتحانی مراکز کے 500 میٹر کی حدود میں موبائل اور انٹرنیٹ سروسز معطل کی گئی تھی۔
