The news is by your side.

Advertisement

پنجاب : رشوت خور پٹواری اور انسپکٹر سمیت 6 ملزمان گرفتار

لاہور : پنجاب میں محکمہ اینٹی کرپشن نے مختلف شہروں میں کارروائیاں کرکے پٹواری، بلڈنگ انسپکٹر اور مفرور اشتہاریوں سمیت6 ملزمان کو گرفتار کرلیا۔

اس حوالے سے ذرائع کا کہنا ہے کہ اینٹی کرپشن کے عملے نے فیصل آباد، سرگودھا، گوجرانوالہ، بہاولپور، اور خوشاب میں کارروائیاں کیں۔

گرفتار ملزمان کے قبضے سے رشوت کے طور پر لیے گئے ہزاروں روپے برآمد کرکے مقدمات درج کرلئے گئے ہیں، مزید تحقیقات جاری ہیں۔

ذرائع کے مطابق میونسپل کارپوریشن بہاولپور کے دفتر میں اینٹی کرپشن ٹیم نے چھاپہ مار کر نائب قاصد محمداعظم کو 9ہزار رشوت لیتے ہوئے رنگے ہاتھوں گرفتار کرلیا۔

ملزم نے جعلی نقشہ فیس کی تیاری کی مد میں رشوت وصول کی تھی، ملزم مدعیان سے پہلے بھی 25ہزار روپے بطور رشوت وصول کرچکا تھا۔

میونسپل کارپوریشن گوجرانوالہ سے بلڈنگ انسپکٹر رانا محمد نواز کو گرفتارکیا گیا رانا محمد نواز کو ضمانت خارج ہونے پر حراست میں لیا گیا۔ مذکورہ ملزم نے منظوری کے بغیر بلڈنگز کی تعمیرات کی اجازت دی تھی۔

فیصل آباد کی یونین کونسل نمبر12سے یو سی نائب قاصد شہزادعلی کو گرفتار کرلیا گیا، ملزم نے جعلی نکاح نامہ جاری کرنے کےعوض 5ہزار روپے رشوت وصول کی تھی۔

اینٹی کرپشن حکام کے مطابق جلال پور پیر والا سے اللہ یار نامی پٹواری کو گرفتار کیا گیا، اللہ یار پٹواری نے2 انتقالات درج کرنے کےعوض 80ہزار روپے وصول کئے۔ اللہ یار پٹواری سے رشوت کی رقم برآمد کرکے مقدمہ درج کرلیا گیا

اس کے علاوہ سرگودھا سے مقدمہ نمبر 21/2019میں مفرور ملزم شاہ نواز کو گرفتار جبکہ خوشاب سے مقدمہ نمبر 55/2021مفرور ملزم رب نواز کو گرفتار کرلیا گیا، ملزم رب نواز نے جعل سازی سے اسٹامپ پیپر تیار کئے تھے۔

Comments

یہ بھی پڑھیں