لاہور : پنجاب اسمبلی کا ہنگامہ خیز اجلاس شروع ہونے سے پہلے ہی ملتوی ہوگیا، آج کے اجلاس میں ڈپٹی اسپیکر کے خلاف تحریکِ عدم اعتماد پر رائے شماری ہونا تھی۔
تفصیلات کے مطابق پنجاب اسمبلی کا ہنگامہ خیز اجلاس شروع ہونے سے پہلے ہی ملتوی کردیا گیا ، اس حوالے سے اسپیکر پنجاب اسمبلی چوہدری پرویز الہٰی نے نوٹیفکیشن جاری کردیا، جس میں کہا گیا اجلاس سولہ مئی تک ملتوی کیا گیا ہے۔
آج کے اجلاس میں ڈپٹی اسپیکر کے خلاف تحریکِ عدم اعتماد پر رائے شماری ہونا تھی جبکہ مہمانوں کی اسمبلی آمد اور ارکان پر موبائل فون لانے پر پابندی لگائی گئی تھی۔
اس موقع پر پنجاب اسمبلی گراؤنڈ میں پولیس کی بھاری نفری تعینات کی گئی تھی۔
خیال رہے ڈپٹی اسپیکر کے خلاف تحریکِ عدم پی ٹی آئی اور ق لیگ نے جمع کرائی تھی، تحریک کی منظوری کیلئے ایک سو چھیاسی ارکان کی حمایت درکارہے۔
واضح رہے مسلم لیگ ن نے ڈپٹی اسپیکر کی حمایت میں 197 ارکان اسمبلی کا شو آف پاور لگانے کا اعلان کیا تھا۔
