لاہور: پنجاب اسمبلی کے 20 حلقوں میں ہونے والے ضمنی انتخاب میں اداکار شان شاہد ووٹ کاسٹ نہ کرسکے۔
میڈیا رپورٹ کے مطابق پاکستان کے معروف اداکار شان شاہد لاہور کے حلقہ پی پی 158 میں اپنا ووٹ کاسٹ کرنے کیلئے پہنچے تاہم پولیس نے انہیں ووٹ کاسٹ کرنے سے روک دیا۔
پولیس کا کہنا ہے کہ اداکار پولنگ کا وقت ختم ہونے کے بعد ووٹ کاسٹ کرنے پہنچے، جس کی وجہ سے انہیں پولنگ اسٹیشن کے اندر جانے سے روکا گیا۔ پولنگ اسٹیشن کی سیکیورٹی پر موجود پولیس اہلکاروں کا کہنا ہے کہ اداکار شان 5 بجکر 6 منٹ پر ووٹ کاسٹ کرنے آئے تھے۔
الیکشن کمیشن کی جانب سے پولنگ کا وقت صبح آٹھ سے پانچ بجے تک مقرر کیا گیا تھا۔
خیال رہے کہ پی ٹی آئی منحرف ارکان کے ڈی سیٹ ہونے کے باعث خالی ہونے والی پنجاب اسمبلی کی 20 نشستوں پر ضمنی انتخاب آج ہورہا ہے، جس میں ن لیگ اور پی ٹی آئی کے درمیان کانٹے کا مقابلہ ہے۔
