لاہور : صوبہ پنجاب میں مختلف سیکٹرز کی ترقیاتی اسکیموں کو مکمل کرنے کیلئے 3ارب 81کروڑ روپے سے زائد کی منظوری دے دی گئی۔
تفصییلات کے مطابق حکومت پنجاب نے رواں مالی سال2018-19کے دوران صوبائی محکمہ پلاننگ اینڈ ڈویلپمنٹ کی صوبائی ڈویلپمنٹ ورکنگ پارٹی کے 22 ویں اجلاس میں مختلف سیکٹرز کی3 ترقیاتی اسکیموں کو مکمل کرنے کے لیے مجموعی طور پر 3ارب 81کروڑ 75 لاکھ 81ہزار روپے کی منظوری دی۔
جبکہ ایگریکلچر اور فشریز وائلڈ لائف اینڈ فارسٹی سیکٹرز کی 3 ترقیاتی اسکیموں کل لاگت 58 ارب 24 کروڑ 13لاکھ 77 ہزار روپے کو پی ڈی ڈبلیو پی فورم کی سفارشات کے ساتھ حتمی منظوری کیلئے وفاقی حکومت کو ارسال کر دی گئی۔
اجلاس کی صدارت چیئرمین پی اینڈ ڈی حبیب الرحمن گیلانی نے کی جبکہ صوبائی سیکرٹری پی اینڈ ڈی افتخار علی سہو سمیت متعلقہ صوبائی محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔
صوبائی ورکنگ پارٹی کے 22ویں اجلاس میں جن 3 ترقیاتی اسکیموں کی منظوری دی گئی ان میں کنوگوئی کے مقام پر اراضی ریکارڈ سنٹر کے قیام (فیز I-) کیلئے 2 ارب 14 کروڑ 61 لاکھ 31 ہزار روپے۔
مظفر گڑھ میں گنیش واہ کینال سے لے کر کچہری چوک (کل لمبائی 2 کلومیٹر) دو رویہ سڑک کی تعمیر (ترمیمی) کیلئے 44 کروڑ 37 لاکھ 72 ہزار روپے اور راولپنڈی میں راوت ہراکا دھودھیال روڈ(راوت تا جوڑیاں) لمبائی 36 کلومیٹر (فیز Iترمیمی) کی تعمیر و مرمت، کشادگی و بحالی کیلئے ایک ارب22کروڑ76لاکھ 78 ہزار روپے شامل ہیں۔
