لاہور : وزیراعلیٰ پنجاب مریم نواز شریف کی زیر صدارت صوبائی کابینہ کے اجلاس میں مسیحی ملازمین کےلئے ایسٹر پر چھٹی کی تجویز پر اتفاق کرلیا گیا۔
تفصیلات کے مطابق وزیراعلیٰ پنجاب مریم نواز شریف کی زیر صدارت صوبائی کابینہ کا چوتھا اجلاس ہوا ، جس میں گندم خریداری اور دیگر امور پر پالیسی سازی کے لئے وزارتی کمیٹی قائم کردی گئی۔
صوبائی وزیر خوراک سربراہ ،وزیر خزانہ،زراعت اور اطلاعات ممبر ہوں گے جبکہ اجلاس میں گندم سے متعلق امور پر ارکان اسمبلی سے مشاورت کر نے پر اتفاق کیا گیا۔
اس حوالے سے وزیراعلیٰ پنجاب مریم نواز شریف نے کہا اجناس کی ضروریات کا تعین کرکے کاشت کی فیصلہ کرنا ضروری ہے، فصل کی ضرورت کا پیشگی تعین کرنے کے لئے اے آئی اور دیگر ٹیکنالوجی استعمال کی جائے۔
مریم نواز کا کہنا تھا کہ پتنگ کی دھاتی تار سے بچاؤ کے لئے بائیک پر سیفٹی گارڈ لگانے کی باقاعدہ مہم شروع کی جائے، مسیحی ورکروں کی ہلاکت پر افسوس ہے، غریب کی جان جائے تو محض خبر بنتی ہے۔
اجلاس میں مسیحی ملازمین کےلئے ایسٹر پر چھٹی کی تجویز پر اتفاق کرلیا گیا جبکہ نقل روکنے کے لئےامتحانی مراکز میں کیمرے اور آرٹیفشل ٹیکنالوجی سے کام لینے کا فیصلہ بھی کیا۔
اجلاس میں اے ایس پی شہر بانو نقوی اور ایس ڈی پی اوگلبرگ کو قائداعظم پولیس میڈل دینے کی سفارش وفاق کو بھیجنے کی منظوری بھی دی گئی۔
اس کے علاوہ ڈیلر وہیکل رجسٹریشن سسٹم ایکسائزملازمین کے کنٹریکٹ میں توسیع اور ایکسائز ٹیکسیشن،نارکوٹکس کنٹرول ڈپارٹمنٹ کے ملازمین کے کنٹریکٹ میں بھی توسیع کی منظوری دی گئی۔
