اسلام آباد: پنجاب حکومت کی جانب سے نیشنل پارک کو نقصان پہنچائے جانے کا انکشاف ہوا ہے۔
تفصیلات کے مطابق راول ڈیم کے قریب وزیر اعلیٰ پنجاب کے کیمپ آفس کی تعمیر پر کام جاری ہے، جس کے لیے نیشنل پارک کے ایریا میں درجنوں درخت کاٹ دیے گئے ہیں۔
ذرائع کا کہنا ہے کہ پنجاب حکومت نے پاک ای پی اے اور سی ڈی اے سے منظوری تک نہیں لی، صوبائی حکومت نے انوائرنمنٹل پروٹیکشن ایجنسی کے نوٹس بھی نظر انداز کر دیے، پہاڑی کی کٹائی سے قدیم مندر کو بھی نقصان پہنچنے کا خدشہ لاحق ہو گیا ہے۔
واضح رہے کہ وزیر اعلی کیمپ آفس کی تعمیر پنجاب کمیونکیشن اینڈ ورکس ڈپارٹمنٹ کر رہا ہے، جب کہ راول ڈیم اور ریسٹ ہاؤس پنجاب ایری گیشن ڈپارٹمنٹ کی ملکیت ہے، حکام کا کہنا ہے کہ اس منصوبے کو شروع کرنے سے پہلے پاک ای پی اے سے اجازت نہیں لی گئی۔
ادارے کے حکام کے مطابق منصوبے سے نیشنل پارک اور ماحولیات کو نقصان پہنچ رہا ہے، پنجاب حکومت کو متعدد نوٹس بھیجے گئے لیکن کوئی جواب نہیں ملا۔
ادھر ڈپٹی ڈی جی انوائرنمنٹ سی ڈی اے کا بھی کہنا ہے کہ یہ تعمیرات سی ڈی اے ریگولیشنز کی خلاف وزی ہیں۔
