لاہور : گورنرپنجاب چوہدری سرور نے اقوام متحدہ سے بھارتی دراندازی کا نوٹس لینے کا مطالبہ کرتے ہوئے کہا ہے کہ آج ملکی دفاع کے لئے پوری قوم پاک فوج کیساتھ کھڑی ہے۔
تفصیلات کے مطابق گورنرپنجاب چوہدری سرور نے بھارتی ایئرفورس کی جانب سے لائن آف کنٹرول کی خلاف ورزی پر ردعمل کا اظہار کرتے ہوئے اقوام متحدہ سے مطالبہ کیا ہے کہ بھارتی فضائیہ کی دراندازی کا نوٹس لیا جائے۔
گورنرپنجاب کا کہنا تھا کہ پاکستانی شاہینوں نےدشمن کوہمیشہ کی طرح منہ توڑجواب دیا، آج ملکی دفاع کیلئےپوری قوم پاک فوج کیساتھ کھڑی ہے۔
یاد رہے بھارتی ایئرفورس کی جانب سے لائن آف کنٹرول کی خلاف ورزی کی گئی ، پاک فضائیہ کی بروقت ردعمل کے بعد بھارتی طیارے فرار ہوگئے۔
مزید پڑھیں : لائن آف کنٹرول کی خلاف ورزی، پاک فضائیہ کا بھرپور جواب، بھارتی طیارے بھاگ گئے
ڈی جی آئی ایس پی آر میجرجنرل آصف غفور کا کہنا تھا کہ بھارتی طیاروں نے مظفرآباد سیکٹر سے دراندازی کی کوشش کی اور مظفر آباد سیکٹر میں تین سے چارمیل اندر آئے، بھارتی طیاروں نے جلد بازی میں اپنا پے لوڈ کھلے علاقے میں گرایا، تاہم پے لوڈ گرنے سے کوئی جانی یا مالی نقصان نہیں ہوا۔
آئی ایس پی آرنے بھارتی طیاروں کی جانب سےجلدبازی میں پھینکےگئے پےلوڈکی تصاویرجاری کیں ہیں۔
خیال رہے چند روز قبل گورنر پنجاب چوہدری سرور کا کہنا تھا کہ بھارت کےپاس جوثبوت ہیں وہ ہمیں فراہم کرے یابین الاقوامی سطح پر سامنےلائے،ہم الزامات کی تفتیش کےلئےتیار ہیں، جنگ نہیں چاہتے، مگر کسی جارحیت کاپاکستان منہ توڑ جواب دے گا۔
