لاہور : پنجاب حکومت نے ایس اوپیزپرعمل کرانے کیلئے پاک فوج کی خدمات مانگ لیں، پاک فوج کے جوان لاہور سمیت 5اضلاع میں تعینات ہوں گے۔
تفصیلات کے مطابق محکمہ داخلہ پنجاب کی جانب سے ایس اوپیزپرعمل کرانے کیلئے پاک فوج کی5کمپنیوں کی خدمات مانگ لیں۔
ذرائع کا کہنا ہے کہ پاک فوج کےجوان ضلعی انتظامیہ کیساتھ ایس اوپیزپرعمل کرائیں گے ، پاک فوج طلب کرنے کے لئے وفاقی وزارت داخلہ کو خط لکھا گیا ہے۔
محکمہ داخلہ ذرائع کے مطابق وفاقی وزارت داخلہ کی جانب سے منظوری دی جاچکی ہے، پاک فوج کے جوان لاہور سمیت 5اضلاع میں تعینات ہوں گے۔
دوسری جانب وزیر اعظم عمران خان کے فیصلے پر عمل درآمد کرتے ہوئے اسلام آباد میں پاک فوج نے ذمہ داری سنبھال لیں اور انتظامیہ نے فوج کے ہمراہ مختلف علاقوں میں گشت شروع کر دیا ہے، گشت کے دوران کرونا ایس او پیز کی خلاف ورزی کرنے والوں کے خلاف ایکشن لیا جا رہا ہے۔
یاد رہے گزشتہ روز وزیر اعظم عمران خان نے ملک میں کرونا کی بگڑتی صورت حال کے پیش نظر شہروں میں فوج طلب کر لی تھی، جس کا مقصد ایس او پیز پر مکمل عمل درآمد کرانا ہے۔
وزیر اعظم نے این سی سی اجلاس کے بعد اظہار خیال کرتے ہوئے کہا کہ ہم نے احتیاط نہ کی تو بھارت جیسے حالات ہو سکتے ہیں، عوام سے کہتا ہوں ایس او پیز پر سختی سے عمل کریں، اگر عوام تعاون اور احتیاط کریں تو لاک ڈاؤن کی نوبت نہیں آئے گی۔
