لاہور : حکومت پنجاب نے صوبے کے سیوریج کے نظام کو جدید بنانے کیلئے امریکی طرز کے ماڈل کو تعمیر کرنے کا فیصلہ کرلیا۔
تفصیلات کے مطابق پنجاب کے سیوریج نظام کو جدید کرنے کا فیصلہ کرلیا گیا، صوبے کے تمام بڑے شہروں کے سیوریج کے نظام کو جدید بنانے کیلئے امریکی ماہرین کی خدمات حاصل کی جائیں گی۔
اس حوالے سے واسا کے اہم وفد نے امریکا کا دورہ کیا، دورے کے دوران امریکا میں قائم سیوریج کے جدید نظام کا تفصیلی جائزہ لیا گیا۔
ورجینیا کے شہر الیگزینڈریا کے سیوریج لائن دورے میں امریکی ماہرین نے پاکستانی وفد کو بریفنگ دی اور اسٹیٹ آف دی آرٹ نظام کی تعمیر پر تجاویز دیں۔
منصوبے کے پہلے مرحلے میں یہ جدید مائیکرو ٹنلز لاہور میں تعمیر کئے جائیں گے، منصوبہ تین سال میں مکمل ہوگا اور اس پر پر مجموعی طور پر 180 ملین ڈالرز کی لاگت آئے گی جسے Asian Infrastructure Investment Bank فنڈ کر رہا ہے/
منصوبے کی تکنیکی باریکیوں سے نمٹنے کیلئے واسا نے امریکا میں مقیم معروف انجینئر رضوان صدیقی کی خدمات حاصل کی ہیں۔
لاہور میں سیوریج کا یہ جدید نظام بیس کلومیٹر ٹرنک سویر پر مشتمل ہوگا، جس کو تیس فٹ زمین کی گہرائی میں جاکر نصب کیا جائے گا،
اس منصوبے کے مکمل ہونے سے سیلاب کا پانی سیوریج کے پانی میں شامل نہیں ہوسکے گا، صاف پانی کا معیار مزید بہتر ہوگا، جبکہ شہر کے ماحول کو بہتر بنانے میں بھی مدد ملے گی۔
