لاہور: پنجاب فوڈ اتھارٹی نے ملاوٹ مافیا سے نمٹنے کے لیے 300 پہلوان اور باکسرز بھرتی کرنے کا فیصلہ کیا ہے۔
تفصیلات کے مطابق پنجاب فوڈ اتھارٹی نے ملاوٹ مافیا اور نوسر بازوں سے نمٹنے کے لیے 300 پہلوان تعینات کرنے کا فیصلہ کیا ہے، پہلوان اور باکسر چھاپہ مارٹیموں کے ہمراہ مختلف کارخانوں، فیکٹریوں اور دکانوں پر چھاپے ماریں گے۔
ترجمان پنجاب فوڈ اتھارٹی کا کہنا ہے کہ پہلوانوں کو تعینات کرنے کا مقصد یہ ہے کہ جب ٹیم چھاپہ مارنے جاتی ہے تو ملاوٹ مافیا کی جانب سے مزاحمت ہوتی ہے اور بعض اوقات بات بڑھ کر تشدد کی صورت بھی اختیار کرجاتی ہے۔
پڑھیں: پنجاب فوڈ اتھارٹی کاایکشن، کیمیکل ملا غیر معیاری دودھ نہروں میں بہا دیا
پنجاب فوڈ اتھارٹی کے ترجمان نے کہا ہے کہ چھاپہ مارنے کے دوران یہ پہلوان ٹیم کے ہمراہ ہوں گے اور اگر اس دوران ملاوٹ مافیا کی جانب سے مزاحمت کی گئی تو یہ خود اُن سے نمٹ لیں گے۔ فوڈ اتھارٹی میں بھرتی ہونے والے پہلوانوں اور باکسروں کو پنجاب حکومت کی جانب سے ہر ماہ تنخواہیں اور راشن الاؤنس بھی دیا جائے گا۔
