لاہور: حکومتِ پنجاب کی جانب سے قصور ویڈیو اسکینڈل کے مقدمات میں سے دہشت گردی کی دفعات ختم کرنے کے خلاف لاہور ہائی کورٹ میں اپیل دائر کر دی۔
پنجاب حکومت کی جانب سے دائر اپیل میں موقف اختیار کیا گیا ہے کہ انسداد دہشت گردی عدالت نے انصاف کے تقاضے پورے کیے بغیر ملزمان کے حق میں فیصلہ سنایا اور مقدمات میں سے دہشت گردی کی دفعات ختم کر دیں۔
اپیل میں کہا گیا ہے کہ محض گواہان کے منحرف ہونے پر عدالت نے دفعات ختم کرتے وقت اس پہلو کو نظر انداز کیا گیا کہ ملزمان بااثر ہیں جو گواہوں اور متاثرہ افراد پر دباو ڈال رہے ہیں تاکہ کیس کو کمزور کیا جا سکے۔
مزید جانیے : قصور ویڈیو اسکینڈل کا مرکزی ملزم تنزیل الرحمن گرفتار
پنجاب حکومت کے مطابق ملزمان انہتائی سفاک اور غیر انسانی سرگرمیوں میں ملوث رہے ہیں جن کی وجہ سے ملک بھر میں دہشت کی فضا قائم ہوئی لہذا ان کے خلاف دہشت گردی کی دفعات کے تحت قائم کیے گئے مقدمات انصاف اور قانون کے مطابق ہیں ۔ پنجاب حکومت نے اپیل کی کہ ماتحت عدالت کی جانب سے دہشت گردی کی دفعات ختم کرنے کے احکامات کو کالعدم قرار دیا جائے۔
