لاہور: پنجاب میں تیز آندھی سے مالی و جانی نقصانات میں اضافہ ہو گیا ہے، پی ڈی ایم اے اور ریسکیو ایمرجنسی سروس پنجاب کی جانب سے صوبہ بھر میں طوفان سے ہونے والے نقصانات سے متعلق ابتدائی رپورٹس جاری کر دی گئی ہیں۔
پی ڈی ایم اے کے مطابق پنجاب بھر میں آندھی و طوفان کے باعث 13 افراد جاں بحق اور 92 زخمی ہوئے ہیں، جب کہ ریسکیو ایمرجنسی سروس پنجاب کے مطابق گزشتہ روز آندھی، طوفان اور موسلا دھار بارشوں کے باعث راولپنڈی سمیت پنجاب کے مختلف شہروں میں 12 افراد جاں بحق جب کہ 219 کے زخمی ہونے کی اطلاعات ہیں۔
ترجمان کے مطابق ریسکیو پنجاب ایمرجنسی سروس نے صوبے کے مختلف اضلاع کے حادثات میں زخمیوں اور ہلاکتوں کے اعداد و شمار جمع کیے ہیں، حافظ آباد اور جھنگ میں ایک ایک فرد جاں بحق ہوا، جب کہ لاہور میں 2، لیہ میں ایک، میانوالی اور ملتان میں بھی ایک ایک شہری جاں بحق ہوا۔
راولپنڈی اور راجن پور میں بھی بارش اور طوفان سے ایک ایک شہری کے جاں بحق ہونے کی اطلاع ہے، شیخوپورہ میں ایک جب کہ سیالکوٹ میں 2 افراد کے جاں بحق ہونے کی اطلاع موصول ہوئی ہے۔
پائلٹ نے کمال مہارت سے طیارہ آندھی کی زد سے نکالا، اسد عمر
ترجمان پی ڈی ایم اے کے مطابق لاہور میں آندھی و طوفان کے باعث 3 شہری جاں بحق ہوئے ہیں، راولپنڈی 1، جہلم 3، شیخوپورہ 1، ننکانہ صاحب1، سیالکوٹ1 اور میانوالی میں بھی 1 شہری جاں بحق ہوا۔
شہریوں کی موت اور زخمی ہونے کی وجہ دیواریں، چھتیں، درخت اور آسمانی بجلی گرنا بتایا گیا ہے، ترجمان پی ڈی ایم اے کے مطابق طوفان کے باعث متعدد کچے اور بوسیدہ مکانات کو نقصان پہنچا ہے، لاہور میں درختوں کے گرنے اور شمسی پینلز کو نقصانات کے واقعات رپورٹ ہوئے ہیں۔
واضح رہے کہ پی ڈی ا یم اے کی جانب سے صوبہ بھر کے کمشنرز، ڈپٹی کمشنر اور ریسکیو اداروں کو الرٹ رہنے کی ہدایت جاری کی گئی ہے، اور شہریوں کو خراب موسم میں غیر ضروری سفر سے بچنے اور بجلی کے کھمبوں اور تاروں سے دور رہنے کی تلقین کی گئی ہے۔
