لاہور : حکومت پنجاب نے صوبے بھر کی جیلوں میں قیدیوں کی ایچ آئی وی ایڈز اسکریننگ کرانے کا حکم دیا ہے، اس کے علاوہ نام نہاد اور جعلی حکیموں کے خلاف کریک ڈاؤن کرنے کے احکامات بھی جاری کیے گئے ہیں۔
تفصیلات کے مطابق وزیر صحت پنجاب ڈاکٹر یاسمین راشد کی زیرصدارت اجلاس منعقد ہوا، اجلاس میں متعلقہ افسران بھی موجود تھے۔
اجلاس سے خطاب کرتے ہوئے ڈاکٹر یاسمین راشد نے حکم دیا کہ پنجاب کی جیلوں میں قیدیوں کی ایچ آئی وی ایڈز اسکریننگ کی جائیں اور قیدیوں کی اصلاح کیلئے جیلوں میں ری ہیبلی ٹیشن سینٹرز قائم کئے جائیں۔
ڈاکٹر یاسمین راشد کا مزید کہنا تھا کہ جیل کے دیگر قیدیوں کو بیماریوں سے بچانے کیلئے ایڈز اور ٹی بی کےمریض قیدیوں کو الگ بیرکس میں رکھا جائے اور جیلوں کے اسپتالوں میں ڈاکٹرز کی کمی کو فوری طور پر پورا کیا جائے۔
اجلاس سے خطاب میں صوبائی وزیر صحت نے ہدایت دی کہ پنجاب بھر کے نام نہاد اور جعلی حکیموں کے خلاف بھی کریک ڈاؤن کیاجائے۔
انہوں نے کہا کہ ٹاسک فورس آن ڈرگ ایڈکشن قائم کرنے کی سفارش کی جائے گی، اس کے علاوہ تعلیمی اداروں میں منشیات سے متعلق آگاہی مہم شروع کی جائے۔
