حکومت کے اہم اتحادی اور پنجاب اسمبلی کے اسپیکر چوہدری پرویز الٰہی نے کہا ہے کہ اس سے قبل کہ دیر ہو پی ٹی آئی بڑے سیاسی فیصلے لے۔
اے آر وائی نیوز کے مطابق اسپیکر پنجاب اسمبلی پرویز الٰہی سے حکومت پنجاب کے وزرا نے ملاقات کی، ملاقات کی اندرونی کہانی سامنے آگئی ہے۔
ذرائع نے بتایا ہے کہ چوہدری پرویز الٰہی نے صوبائی وزرا سے کہا کہ حالات تیزی سے حکومت کے ہاتھ سے نکل رہے ہیں اس سے قبل کہ دیر ہوجائے پی ٹی آئی بڑے سیاسی فیصلے لے۔
.پرویز الٰہی نے کہا کہ سیاست میں جو پہلے فیصلہ لیتا ہے اسی کو برتری حاصل ہوتی ہے، یہاں لمحہ بہ لمحہ صورتحال تبدیل ہورہی ہے
اسپیکر پنجاب اسمبلی نے کہا کہ موجودہ صورتحال پر مشورے بھی ہورہے ہیں اور رابطے بھی کیے جارہے ہیں۔
دریں اثنا موجودہ سیاسی صورتحال پر پی ٹی آئی کے وزرا راجا بشارت اور میاں محمود الرشید نے اسپیکر پنجاب اسمبلی سے ملاقات کی۔
ملاقات کے دوران حکمران جماعت کے دو درجن ارکان کے مبینہ رابطوں کا معاملہ زیرغور آیا۔
ذرائع کے مطابق دونوں صوبائی وزرا نے اسپیکر کو وزیراعلیٰ پنجاب عثمان بزدار کا خصوصی پیغام پہنچایا اور بلدیاتی الیکشن، مجوزہ لوکل باڈیز ڈرافٹ سے بھی آگاہ کیا۔
