لاہور: پنجاب میں 24 گھنٹوں کے دوران آشوب چشم کے مزید 2 ہزار 167 کیسز رپورٹ ہوئے ہیں۔
تفصیلات کے مطابق 24 پنجاب میں آشوب چسم کی وبا شدت اختیار کرگئی ہے، پنجاب میں 24 گھنٹوں کے دوران آشوب چشم کے مزید 2 ہزار 167 کیسز رپورٹ ہوئے ہیں جبکہ لاہور میں گزشتہ روز آشوب چشم کے 142 نئے مریض رپورٹ ہوئے۔
محکمہ صحت پنجاب کے مطابق بہاولپور میں گزشتہ روز آشوب چشم کے 335 نئے مریض سامنے آئے، ملتان میں 131، فیصل آباد میں 193 اور راولپنڈی میں آشوب چشم کے 43 نئے کیسز رپورٹ ہوئے ہیں۔
آشوب چشم کیا ہے؟
’آشوب چشم‘ کو انگریزی میں (conjunctivitis) کہا جاتا ہے جو کہ آنکھوں کا عام وائرل انفیکشن ہوتا ہے اور اس میں آنکھیں گلابی یا سرخ ہوجاتی ہیں اور متاثرہ شخص کی آنکھوں میں خارش رہتی ہے۔
علامات کیا ہیں؟
آشوب چشم کی علامات میں آنکھوں میں سرخی، جلن، خارش، چبھن، سوزش اور متاثرہ آنکھ سے پانی نکنا شامل ہیں۔
اگر آپ کو ان میں سے کسی بھی علامت کا سامنا ہو تو آنکھوں کو رگڑنے سے گریز کریں اور ڈاکٹر سے رجوع کریں تاکہ انفیکشن پھیلنے کا کم سے کم خطرہ ہو۔
