کراچی : سابق وزیر اعلیٰ سندھ سید قائم علی شاہ نے کہا ہے کہ اسپیکر سندھ اسمبلی آغا سراج درانی کی گرفتاری سیاسی انتقام کا تسلسل ہے، انہیں شہید بھٹو سے وفاداری کی سزادی جارہی ہے۔
ان خیالات کا اظہار انہوں نے کراچی میں صحافیوں سے گفتگو کرتے ہوئے گرفتاری پر اپنے رد عمل میں کیا، قائم علی شاہ نے کہا کہ ہمیں ہمیشہ سیاسی انتقام کا نشانہ بنایا گیا۔
عدالتوں میں ہماری کئی سالوں تک کردار کشی کی گئی لیکن آخر میں باعزت بری ہوئے، اسپیکر سندھ اسمبلی کی گرفتاری بھی سیاسی انتقام کاتسلسل ہے، آغا سراج درانی جیسے نفیس شخص کو بھی بھٹو سے وفاداری کی سزا دی جارہی ہے۔
ایک سوال کے جواب میں قائم علی شاہ کا کہنا تھا کہ سندھ منی پاکستان ہے، عوام کے حقوق پر ڈاکہ پاکستان پر ڈاکہ تصور ہوگا، آغا سراج درانی کی گرفتاری 18ویں ترمیم پر حملوں کی کڑی ہے۔
