اسلام آباد : پاکستان تحریک انصاف نے قومی اسمبلی کی قائمہ کمیٹیوں کا بائیکاٹ ختم کر دیا، عمران خان نے پارٹی ایم این ایز کو کمیٹی اجلاس میں جانے کی اجازت دے دی تاہم قومی اسمبلی کے اجلاس کا بائیکاٹ جاری رہے گا۔ اجلاس میں شریف فیملی کے خلاف بنائی جانے والی دستاویزی فلم سوشل میڈیا پر جاری کرنے کی منظوری دے دی گئی۔
تفصیلات کے مطابق پاکستان تحریک انصاف کی پارٹی قیادت کا اہم اجلاس چیئرمین پی ٹی آئی عمران خان کی زیر صدارت بنی گالا میں منعقد ہوا، اجلاس میں ملک کی موجودہ سیاسی صورت حال اور پانامہ لیکس کے معاملے پر حکمت عملی بھی زیر غوررہی۔
اس دوران عمران خان نے شریف خاندان کی کرپشن پر مبنی دستاویزی فلم کا جائزہ لیا اور سوشل میڈیا پر جاری کرنے کی منظوری دے دی۔
مذکورہ فلم میں شریف خاندان کی مبینہ کرپشن اور سپریم کورٹ میں پیش کئے گئے قطری شہزادے کے خط کو دکھایا گیا ہے۔
واضح رہے کہ اس سے پہلے بھی عمران خان اپنے کئی جلسوں میں نواز شریف اور ان کے خاندان کے متضاد بیانات کی دستاویزی فلم چلا چکے ہیں۔
مزید پڑھیں : پی ٹی آئی کا پارلیمنٹ کےمشترکہ اجلاس کےبائیکاٹ کا فیصلہ
پی ٹی آئی ذرائع کے مطابق اجلاس کے دوران عمران خان نے پارٹی رہنماؤں سے قومی اسمبلی کی قائمہ کمیٹیوں کا بائیکاٹ ختم کرنے سے متعلق مشاورت کی، جس کے بعد پارٹی ایم این ایز کو آئندہ قومی اسمبلی کی قائمہ کمیٹیوں میں شرکت کی اجازت دے دی گئی،تاہم قومی اسمبلی کے اجلاس کا بائیکاٹ جاری رہے گا۔
یہاں یہ امر قابل ذکر ہے کہ پی ٹی آئی کے سینیٹرز پہلے ہی سینیٹ کی قائمیہ کمیٹیوں میں شرکت کر رہے ہیں۔
