راولپنڈی: آرمی چیف آف اسٹاف جنرل قمر جاوید باجوہ نے فلسطین کے سفیر ولید ابو علی سے ملاقات کی اور پاکستان کی جانب سے ہر ممکنہ تعاون پیش کرنے کی یقین دہانی کروائی۔
پاک فوج کے تعلقاتِ عامہ (آئی ایس پی آر) سے جاری اعلامیے کے مطابق آرمی چیف سے ملاقات میں ولید ابو علی نے فلسطین کاز کے لیے پاکستان کے تعاون کا شکریہ ادا کیا۔
اس موقع پر آرمی چیف کا کہنا تھا کہ مسئلہ کشمیر کی طرح مسئلہ فلسطین پر بھی یکساں مؤقف رکھتے ہیں، پاکستان اس مسئلے پر اپنا ہر ممکن تعاون جاری رکھے گا۔
جنرل قمر جاوید باجوہ کا کہنا تھا کہ پاکستانی قوم مسئلہ فلسطین کے لیے سیاسی، سفارتی اور اخلاقی حمایت جاری رکھے گا۔
مزید پڑھیں: یروشلم تنازع: ڈونلڈ ٹرمپ کا فیصلہ ناقابل قبول
بعد ازاں سپہ سالار سےسعودی نائب وزیردفاع محمدبن عبداللہ کی ملاقات ہوئی جس میں سیکیورٹی صورتحال اور دفاعی امور پر تبادلہ خیال کیا گیا۔
دورانِ ملاقات پاکستان اور سعودی عرب کے درمیان بڑھتے ہوئے دفاعی تعلقات پر گفتگو کی گئی، اس موقع پر سعودی نائب وزیر دفاع نے پاک فوج کی پیشہ وارانہ صلاحیتوں اور کارکردگی کو سراہا۔
یاد رہے کہ ٹرمپ نے 6 دسمبر کو پریس کانفرنس کرتے ہوئے یروشیلم کو اسرائیل کا دارالحکومت تسلیم کرنے اور امریکی سفارت خانے کو منتقل کرنے کا اعلان کیا تھا۔
یہ بھی پڑھیں: یروشلم تنازع : سلامتی کونسل نے ٹرمپ کا فیصلہ مسترد کردیا
اسلامی ریاستوں سمیت تمام ہی ممالک نے ٹرمپ کے اس فیصلے کو شدید تنقید کا نشانہ بنایا اور متنبہ کیا کہ اگر اس طرح کا کوئی اقدام کیا گیا وہ خطے میں امن و امان کو متاثر کرتے گا۔
