The news is by your side.

Advertisement

دوہزارسال قدیم جشن کی تیاری شروع

چترال: خیبر پختونخوا کے خوبصورت ضلع چترال میں جشنِ قاقلشٹ (جشنِ بہاراں) کا آغاز اپریل کے آغاز ہونے جارہا ہے، اس موقع پر سیاحوں کی کثیر تعداد چترال کا رخ کرتی ہے۔

پاکستان کو قدرت نے بے شمار رنگوں اور نعمتوں سے نوازا ہے اور انہی میں سے ایک خطہ چترال بھی ہے۔جشنِ قاقلشٹ اپر چترال میں واقع قدرت کے حسین رنگوں سے مزین میدان قاقلشٹ میں منعقد ہوتا ہے، جہاں کے سر سبز مناظر دیکھ کر انسان فطرت کی رونقوں کا مداح بن جاتا ہے۔

جشنِ قاقلشٹ میں مختلف مقامی کھیلوں کے مقابلے منعقد ہوتے ہیں جن میں فری اسٹائل پولو، نشانہ بازی، رسہ کشی، ہاکی وغیرہ شامل ہیں اور کرکٹ، فٹ بال و دیگر کھیلوں کے علاوہ پیرا گلائیڈنگ اور کار ریس کا بھی شاندار مظاہرہ کیا جاتا ہے، جبکہ چترالی موسیقی، مشاعرہ اور ثقافتی ملبوسات کی نمائش سے بھی سیاحوں کو لطف اندوز کیا جاتا ہے۔

فیسٹول میں کلچر نائٹ، بون فائر، فائر ورکس کے علاوہ ملکی تاریخ میں پہلی بار فلڈ لائٹس میں پولو کھیلا گیا تھا اور اس سال بھی ا س کا اہتمام ہوگا، اس کے علاوہ ہاکی، فٹبال اور کرکٹ کے مقابلے بھی منعقد کیے جائیں گے۔

جشنِ قاقلشٹ مجوعی طور پر تین دنوں پر محیط ہوتا ہے جہاں دن رات مختلف سرگرمیاں منعقد ہوتی ہیں جن سے مقامی، ملکی اور غیر ملکی سیاح لطف اندوز ہوتے ہیں۔

سیاحوں کے ٹھرنے کے لیے کیمپنگ کی سہولیات کے ساتھ ساتھ گیسٹ ہاؤس بھی موجود ہیں جہاں مناسب قیمت پر لذیز کھانے اور دیگر سہولیات میسر ہیں۔تو پھر دیر کس بات کی، بیگ پیک کیجئے اور جشنِ قاقلشٹ میں شرکت کرکے قدرت کے حسین مناظر اور منفرد ثقافت سے بھر پور خطے کی خوبصورتی سے لطف اٹھائیں۔

دو ہزار سالہ تاریخ پر مشتمل جشن قاقلشٹ فیسٹول اپنے روایتی انداز سے ہرسال منایا جاتا ہے، تاہم 2017 میں سیکیورٹی وجوہات کی بنا پر اسے منسوخ کردیا گیا تھا۔

قاقلشٹ کی خاص بات یہ بھی ہے کہ اس میں شرکاء کے لیے چترال کے خصوصی کھانے فروخت کے لیے پیش کیے جائیں گے جن میں اخروٹ کی روٹی، چاول کی چٹنی و دیگر شامل ہیں۔

Comments

comments

یہ بھی پڑھیں