اسلام آباد : قومی اسمبلی میں وفاقی وزیر پیٹرولیم مصدق ملک نے کہا قطر سے 5 ایل این جی کارگوز کی خریداری مؤخر کر دی ہے اور جنوری میں اضافی کارگو دینے سے انکار کردیا۔
تفصیلات کے مطابق قومی اسمبلی میں گیس کی مقامی پیداوارمیں کمی اور مہنگے داموں ایل این جی درآمد پر توجہ دلاؤ نوٹس پیش کیا گیا ، نوٹس پیپلز پارٹی کے سید نوید قمر نے پیش کیا۔
وفاقی وزیر پیٹرولیم مصدق ملک نے بتایا کہ جوایل این جی خریدرہےہیں وہ ٹرم کنٹریکٹ کے ذریعے خرید رہے ہیں، اس وقت ملک میں ایل این جی سرپلس ہے، تمام گیس کی یکساں قیمت طے نہیں کی ہے، یکساں قیمت نہ ہونےسے3600والی ایل این جی کاکوئی گاہک نہیں۔
مصدق ملک کا کہنا تھا کہ کہا گیا تھا بجلی ایل این جی کے 600 ملین یونٹ خریدے گی مگر 250 ملین یونٹ خرید رہی ہے، ایک کمپنی سے اضافی کارگو اگلے سال تک ڈیفر کرنے کی کوشش میں ہیں۔
انھوں نے بتایا کہ ہر سال اکتوبر میں ہمیں ایک پلان دینا ہوتا ہے، ہم نے کہا جنوری میں ضرورت بہت زیادہ بڑھ جاتی ہے تو جنوری میں ایک اضافی کارگو دے دیں۔
وفاقی وزیر نے کہا کہ قطر سے 5کارگوز کی خریداری مؤخر کر دی ہے، ایک اورکمپنی سے5کارگوزکی خریداری مؤخر کرنے پر بات ہو رہی ہے، قطرسےجنوری میں ایک اضافی کارگو کی درخواست کی لیکن قطر نے جنوری کے مہینے میں اضافی کارگو دینے سے انکار کر دیا۔
ان کا مزید کہنا تھا کہ عوام کی سہولت کیلئےایک اضافی کارگوضروری تھا، اس ایک کارگو کیلئے ٹینڈر دیا گیا ہے۔
