دوحہ : قطر کی جانب سے سابق وزیراعظم عمران خان پر قاتلانہ حملے کی شدید مذمت کرتے ہوئے کہا گیا ہے کہ پاکستان میں استحکام اور خوشحالی کے خواہاں ہیں۔
تفصیلات کے مطابق وزارت خارجہ قطر کی جانب سے بیان میں کہا گیا ہے کہ سابق وزیراعظم عمران خان پر حملے کی شدید مذمت کرتے ہیں۔
وزارت خارجہ قطر کا کہنا تھا کہ قطر سیاست میں ہرقسم کے تشدد کو مسترد کرتا ہے، پاکستان میں استحکام اور خوشحالی کے خواہاں ہیں، عمران خان کی جلد صحتیابی کیلئےدعاگو ہیں۔
یاد رہے عمران خان پر قاتلانہ حملے کی امریکا، برطانیہ، کینیڈا، سعودی عرب، او آئی سی نے شدید مذمت کرتے ہوئے حکومت پاکستان سے جامع تحقیقات کا مطالبہ کیا ہے۔
امریکی رکن کانگریس شیلا جیکسن نے عمران خان پر قاتلانہ حملے کی مذمت کرتے ہوئے کہا ہے کہ عمران خان ایک پُرامن احتجاج کی قیادت کر رہے تھے جب گولیاں چلنے لگیں، پاکستانی حکومت فوری جامع تحقیقات کرے تاکہ پتہ چل سکے حملے میں کون ملوث ہے۔
برطانوی وزیر خارجہ جیمز کلیورلی نے عمران خان پر حملے کی مذمت کرتے ہوئے اس کو انتہائی تشویشناک قرار دیا ہے۔
