دوحہ : قطر کی حکومت اور دیگر ممالک کو مطلوب دہشت گرد کے بیٹے کی شادی پر قطری اخبارات نے جریدوں اور سوشل میڈیا پر مبارک باد کے اشتہارات شائع کردیے۔
تفصیلات کے مطابق قطر کی حکومت کو مطلوب دہشت گرد عبد الرحمان النعیمی کے بیٹے کی شادی پر قطری اخبارات نے مبارک باد کے پیغامات شائع کیے ہیں۔ عبد الرحمان النعیمی کا نام اس فہرست میں پہلے نمبر پر ہے، جو کچھ عرصہ قبل ہی قطری وزارت داخلہ کی طرف سے جاری کی گئی تھی۔
غیر ملکی خبر رساں ادارے کے مطابق قطر کے سب سے بڑے روزنامے ’الرزیہ‘ نے اپنی ویب سائٹ اور اخبارات میں 11 اپریل کو عالمی دہشت گرد تنظیم القاعدہ کو بھاری فنڈنگ کرنے والے تاجر عبد الرحمان النعیمی کے بیٹے کی شادی پر تہنیتی پیغامات کوریج دی۔
قطرکے اخبار کی ویب سائٹ پر شائع کی گئی تصاویر میں قطر کی متعدد اہم سیاسی اور مذہبی شخصیات کو واضح طور پر دیکھا جاسکتا ہے، جس میں حکومتی آئل ایڈوائزر عبداللہ السلیطی بھی موجود ہیں۔
واضح رہے کہ عبد الرحمان پر سنہ 2014 میں امریکا اور برطانیہ کی وزارت دفاع نے بھی پانبدی عائد کرتے ہوئے دونوں ملکوں میں ان کے اثاثہ جات کو منجمد کرکے تمام بینکوں کے ساتھ معاملات کوممنوعہ قرار دیا تھا۔
امریکا کا مؤقف ہے کہ عبد الرحمان گذشتہ دس برس سے عالمی دہشت گرد تنظیم القاعدہ کو مالی مدد اور دیگر جنگی اشیاء فراہم کررہے ہیں۔
امریکا کی وزارت خزانہ کے مطابق سنہ 2014 میں مذکورہ شخص نے عراق میں القاعدہ کے دہشت گردوں کو بیس لاکھ سے زائد ڈالر کی امداد کی تھی، وزارت خزانہ نے بتایا کہ سنہ 2013 میں بھی النعیمی القاعدہ کو 6 لاکھ ڈالر جبکہ سنہ 2012 میں صومالیہ کی حرکت الشباب کو ڈھائی لاکھ ڈالر کی خطیر رقم دے چکے ہیں۔
خیال رہے کہ عبد الرحمان النعیمی سنہ 2004 میں قائم ہونے والی غیر سرکاری این جی او ’الکرامہ‘ کے سربراہ ہیں، اور مذکورہ تنظیم سعودی عرب، متحدہ عرب امارات، بحرین اور مصر کی کالعدم تنظیمیوں کی فہرست میں شامل ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
