امیر قطر شیخ تمیم بن حمد بن خلیفہ آل ثانی دورے پر ایران پہنچ گئے ہیں۔
غیر ملکی میڈیا رپورٹ کے مطابق تہران پہنچنے پر ایرانی صدر ڈاکٹر مسعود پزشکیان نے قطری امیر کا پرتپاک استقبال کیا، قطری امیر کو گارڈ آف آنر پیش بھی پیش کیا گیا۔
دونوں رہنماؤں نے ملاقات میں غزہ کی عوام کے لیے بھی اسلامی ممالک کے مربوط اقدامات کی ضرورت پرزور دیا۔ خطے میں تنازعات کے حل کا بہترین زریعہ بات چیت ہونے پر بھی اتفاق کیا گیا۔
اس موقع پر صدر ایران نے کہا کہ پڑوسی اور علاقائی ملکوں کے ساتھ اقتصادی، سیاسی، ثقافتی، فوجی اور سیکیورٹی روابط میں توسیع اور تقویت اسلامی جمہوریہ ایران کی بنیادی پالیسی ہے اور اس درمیان دوست اور برادر ملک قطر کو خاص اہمیت حاصل ہے۔
ڈاکٹر مسعود پزشکیان نے اس پریس کانفرس میں کہا کہ غزہ میں جنگ بندی اور فلسطینی قیدیوں کی رہائی کے لئے قطر کی ثالثی کی کوششوں کی قدردانی بھی ضروری ہے۔
ایرانی صدر کا کہنا تھا کہ امیر قطر سے ملاقات میں، غزہ کے عوام کے درد وغم کو کم کرنے اور مشکلات دور کرنے نیز ان کے خلاف صیہونیوں کے جرائم کا سلسلہ روکنے کے لئے، اسلامی ملکوں کی متحدہ کوششوں کی ضرورت پر بھی زور دیا گیا۔
دوسری جانب امیر قطر نے اپنے دورہ تہران پر خوشی کا آظہار کیا اور کہا کہ ان کا یہ دورہ ایسے حالات میں انجام پایا ہے کہ علاقے کو تغیرات اور چیلنجوں کا سامنا ہے جن سے نمٹنے کے لئے ہمیں باہمی مشاورت اور ہم آہنگی کی ضرورت ہے۔
واضح رہے کہ امیر قطر شیخ تمیم بن حمد بن خلیفہ آل ثانی کے دورہ ایران پر دونوں ممالک کے درمیان معیشت، تجارت اور سرمایہ کاری کے شعبوں میں تعلقات کو مضبوط بنانے کے ساتھ ساتھ مشترکہ علاقائی اور بین الاقوامی مسائل ایجنڈے میں شامل تھے۔
