سینٹرل ڈائریکٹوریٹ آف نیشنل سیونگز یا قومی بچت بینک نے بہبود سیونگ سرٹیفکیٹ کے منافع کی شرح میں ایک ماہ میں دوسری مرتبہ کمی کردی۔

بہبود سرٹیفکیٹس پر منافع میں کمی 25 فروری سے نافذ العمل ہوگئی اس سے قبل 31 جنوری کو منافع کی شرح میں کمی کی گئی تھی۔

بہبود سرٹیفکیٹس کو حکومت نے 2003 میں بیواؤں اور بزرگوں کو درپیش مشکلات کو مدنظر رکھتے ہوئے شروع کیا تھا کیونکہ یہ مناسب شرح پر ماہانہ منافع فراہم کرتا ہے۔

بہبود سیونگ سرٹیفکیٹس 5,000 روپے، 10,000 روپے، 50,000 روپے، 100,000 روپے، 500,000 روپے اور 1,000,000 روپے کی مالیت میں دستیاب ہیں۔

سرٹیفکیٹ پاکستان کے درج ذیل شہریوں میں سے کوئی بھی خرید سکتا ہے، بزرگ شہری جس کی عمر 60 سال یا اس سے زائد ہو، بیوہ جب تک کہ وہ دوبارہ شادی نہ کرے، معذور افراد اور نابالغ والدین کے ذریعے سرٹیفکیٹس حاصل کرسکتے ہیں۔

ایک فرد زیادہ سے زیادہ 7.5 ملین روپے کی سرمایہ کاری کرسکتا ہے جبکہ مشترکہ سرمایہ کاروں کے لیے حد 15 ملین روپے مقرر کی گئی ہے۔

حکومت نے بہبود سیونگ سرٹیفکیٹس پر منافع کی شرح 13.58 فیصد مقرر کی ہے جس کے مطابق لوگ ایک لاکھ روپے کی سرمایہ کاری پر 1131 روپے منافع حاصل کرسکتے ہیں۔