کوئٹہ: پی بی 50 قلعہ عبداللہ میں مجک پولنگ اسٹیشن میں مسلح افراد گھس گئے اور پولنگ اسٹیشن میں فائرنگ کی۔
تفصیلات کے مطابق قلعہ عبداللہ میں حساس قرار دیے گئے پولنگ اسٹیشن میں مبینہ طور پر ایک امیدوار کے مسلح حمایتی گھس گئے۔ مسلح افراد نے پولنگ اسٹیشن کے احاطے میں فائرنگ بھی کی۔
فائرنگ کے بعد مقررہ وقت تک پولنگ اسٹیشن پر پولنگ شروع نہ ہوسکی۔ انتخابی عملہ نے بتایا کہ فائرنگ سےکسی جانی نقصان کی اطلاع نہیں ملی۔
اے آر وائی کے مطابق فائرنگ کے سبب علاقے میں کشدیدگی پائی گئی اور لوگوں میں خوف و ہراس پھیل گیا جبکہ صبح سے ہی علاقے کے حالات ٹھیک نہیں تھے.
یہاں ضمنی انتخابات کے لیے پولنگ کا عمل صبح 8 بجے شروع ہوا تھا۔ ضلع حکام نے اس بات کی تصدیق نہیں کی کہ یہ کس امیدوار کے حمایتی لوگ تھے یا ان کا کس جماعت سے تعلق تھا۔
فائرنگ سے بھگدڑ مچ گئی اور پولنگ کا عمل رک گیا، مذکورہ پولنگ اسٹیشن لیویز کی حدود میں آتا ہے اور اسے حساس پولنگ اسٹیشن میں سے ایک قرار دیا گیا تھا۔
