اسلام آباد: قائد اعظم یونیورسٹی اسلام آباد نے پاکستان کی یونیورسٹیوں میں اپنی نمبر 1 پوزیشن برقرار رکھی ہے۔
تفصیلات کے مطابق ’’ٹائمز ہائر ایجوکیشن ورلڈ رینکنگ 2025‘‘ جاری کر دی گئی، جس میں قائد اعظم یونیورسٹی اسلام آباد نے اپنا یہ اعزاز برقرار رکھا ہے کہ ٹاپ 500 میں 401 ویں نمبر پر براجمان ہے۔
کیو ایس ورلڈ یونیورسٹی رینکنگ میں بھی قائد اعظم یونیورسٹی نے 315 ویں پوزیشن حاصل کی تھی۔
وائس چانسلر قائد اعظم یونیورسٹی پروفیسر ڈاکٹر نیاز احمد اختر نے اساتذہ، طلبہ، المنائی اور ملازمین کو یونیورسٹی کی عالمی درجہ بندی کی کامیابی پر مبارک باد دی ہے۔
پروفیسر ڈاکٹر نیاز احمد اختر نے کہا کہ مالی چیلنجوں کے باوجود قائد اعظم یونیورسٹی نے عالمی درجہ بندی میں سال بہ سال اضافہ اور ترقی کی ہے، حکومت اور ہائر ایجوکیشن کمیشن کے مزید تعاون اور توجہ سے یونیورسٹی دنیا کی ٹاپ 200 جامعات میں شامل ہو سکتی ہے۔
وائس چانسلر کا کہنا تھا کہ قائد اعظم یونیورسٹی ملک کی اقتصادی ترقی میں اہم کردار ادا کرنے کی بھرپور صلاحیت رکھتی ہے۔
