پاکستان سپر لیگ (پی ایس ایل) کے آئندہ آٹھویں ایڈیشن میں پشاور زلمی کے بائیں ہاتھ کے تیز گیند باز وہاب ریاض کی شرکت پر سوالیہ نشان لگ گیا۔
پاکستان کے فاسٹ باؤلر کو حال ہی میں پنجاب حکومت کی نگراں کابینہ میں وزیر کھیل مقرر کیا گیا ہے۔ کرکٹ ویب سائٹ نے اپنے ذرائع کے حوالے سے بتایا ہے کہ وہاب ریاض 12 فروری کی شام وزیر کھیل کے عہدے کا حلف لیں گے۔
تقریب حلف برداری کے بعد بائیں ہاتھ کے پیسر فیصلہ کریں گے کہ وہ پی ایس ایل میں حصہ لیں گے یا نہیں۔
وہاب کے قریبی ذرائع کا کہنا ہے کہ اس بات کا امکان نہیں ہے کہ فاسٹ باؤلر ٹورنامنٹ میں زلمی کی نمائندگی کر سکیں گے کیونکہ وزیر کھیل کے طور پر ذمہ داریوں کا بوجھ بڑھ گیا ہے۔
پی ایس ایل کے اٹھویں ایڈیشن کا آغاز 13 فروری سے ہو گا اور پشاور زلمی کی قیادت اس بار بابراعظم کریں گے۔
