کوئٹہ : گزشتہ روز کوئٹہ میں ہونے والی پانچ خواتین کے قتل کے خلاف ہزارہ ڈیموکریٹ پارٹی کی جانب سے شدید احتجاج کیا گیا کمانڈرسدرن کمانڈ لیفٹیننٹ جنرل عامر ریاض نے متاثرہ خاندانوں سے اظہار تعزیت کرتے ہوئے واقعے میں ملوث ملزمان کو کیفرکردارتک پہنچانے کی یقین دہانی کرائی۔
تفصیلات کے مطابق کوئٹہ میں گزشتہ روز بس میں 5 خواتین کوفائرنگ کرکے قتل کئے جانے کے خلاف ہزارہ ڈیموکریٹ پارٹی کی جانب سے کوئٹہ پریس کلب کے باہراحتجاجی مظاہرہ کیا گیا،۔
مظاہرین میں مردوں کے ساتھ خواتین بھی شریک ہوئیں، شرکاء نے دہشت گردی کے واقعات اور حکومت کے خلاف شدید نعرے بازی کی اور خواتین کی ٹارگٹ کلنگ پر شدید غم و غصہ کا اظہار کیا۔
مظاہرین نے مطالبہ کیا کہ ملزمان کو جلد از جلد کیفر کردارتک پہنچایا جائے، واقعہ کے خلاف حرمت نسواں فاﺅنڈیشن کے عہدیداروں کی جانب سے پریس کانفرنس کی گئی، جس میں انہوں نے خواتین کے قتل کو صوبے کے روایات کے منافی اوردشمن کی جانب سے سازش قرار دیتے ہوئے حکومت کی جانب سے سیکورٹی اقدامات پر عدم اطمینان کا اظہار کیا۔
مزید پڑھیں : کوئٹہ میں بس پر فائرنگ، چار خواتین جاں بحق
کمانڈر سدرن کمانڈ کا کہنا تھا کہ واقعہ ملوث دہشت گردوں کو کیفر کردار تک پہنچایا جائے گا‘دشمن ہم میں نفاق ڈالنا چاہتا ہے اتحاد و یکجہتی کا مظاہرہ کرکے دشمن کے عزائم کو ناکام بنادیں گے۔
