کوئٹہ: وزیراعلیٰ بلوچستان جام کمال خان نے مشن روڈ بم دھماکے کی شدید الفاظ میں مذمت کرتے ہوئے دہشت گردی کے واقعہ میں قیمتی جانوں کے ضیاع پر دکھ اور افسوس کا اظہار کیا
اپنے تعزیتی بیان میں وزیراعلیٰ بلوچستان کا کہنا تھا کہ عوام کے جام ومال کے تحفظ کو ہرصورت یقینی بنایا جائے گا۔ جام کمال نے آئی جی پولیس کو کوئٹہ شہر کے سیکیورٹی پلان پر نظر ثانی کرتے ہوئے اسے مزید موثر اور کارگر بنانے کی ہدایت کی ہے۔
وزیراعلیٰ نے پولیس اور سیکیورٹی کے دیگر اداروں کو مربوط حکمت عملی کے تحت دہشت گردوں اور ان کے سرپرستوں کے خلاف بھرپور قوت کے ساتھ کارروائی کرنے کی ہدایت بھی کی ہے۔
انہوں نے مزید ہدایت کی ہے کہ عوام کے جان ومال کے تحفظ کو ہرصورت یقینی بنایا جائے اور بدامنی پیدا کرنے کے دشمن کے عزائم کو ناکام بنانے میں کوئی کسر اٹھا نہیں رکھی جائے۔
کوئٹہ، شو مارکیٹ میں دھماکا، ایک شخص جاں بحق، 9 زخمی
ان کا کہنا تھا کہ دہشت گردوں نے ایک مرتبہ پھر معصوم اور بے گناہ لوگوں کو نشانہ بناکر بربریت کا مظاہرہ کیا، دہشت گردوں کا کوئی مذہب اور قوم قبیلہ نہیں یہ صرف قاتل ہیں جنہیں کسی صورت معاف نہیں کیا جاسکتا۔
وزیراعلیٰ نے واقعہ میں شہید ہونے والے افراد کے خاندانوں سے تعزیت اور ہمدردی کا اظہار اور زخمیوں کی جلد صحت یابی کی دعا کی ہے جبکہ انہوں نے زخمیوں کو علاج معالجہ کی بہترین سہولتوں کی فراہمی کی ہدایت بھی کی ہے۔
